MUNGSHIKHÜN 89 - AMÜSÜH HÜM CL Bible (BSI)

¹ Inü lünnü Atungpuh mihmüthsümbo khün thsübah; nü thiyuro lakhi I münnü lünbo alala ki mükheahshihbah.

Trükshih Küpkhukchoki Khün

² Tümüde inü tha, “Mihmüthsüm lünnü rünkihde alabah; nünü yinmibo ching nü thiyuro lashihbah.”

³ “Inü mokhitkhi kheak inü tangzüng khülang thsüdo, inü I yamlarü David ki thiyuchihchimdo:

⁴ ‘Inü nü müjih lünnü alashihbah, tüsho lünbo alala ching nü kiulongthsü-binkiu lashihbah.’ ”

⁵ Tüsho yinmibonü nü amüyinsahbebo shibah, O Atungpuh ; amüsührü mukhungkhi ching nü thiyuro lah.

⁶ Tümüde yinmibo ching shepünü Atungpuh kheak akekhukba? Wuto tsührübo lung shepü Atungpuh nangde la?

⁷ Thrünpuh ju amüsührü mukhungkhi ching tode atrepü lah, tüsho api mükamde alarü alalanü wüntre jihpü lah.

⁸ O Atungpuh Wuto Thrünpuh, O Atungpuh , nü nangde she wuto la? Nü thiyuro lakhinü nü mükamdolah.

⁹ Nünü keto ato kurung yakzan shuhchoh; küyimki abükde akihbanü, nünü keamloshihchoh.

¹⁰ Nünü Rahab ju alaksahkhi nangde dükheakshih; nünü nü bin amürangnü nü riribo müzütshih.

¹¹ Yinmibo nü yo, alomi she nü yo; alomiküp tüsho ju ching lüpdükhi nünü thrün.

¹² Dukulim tüsho düjinglim nünü thrün; Tabor tüsho Hermon nü mung ching asühachihchoh.

¹³ Nü bin amürang lah; amüküp ju nü khah, tüsho achang ju nü khah tsülim ah.

¹⁴ Thiyuro-lungki tüsho thiyuro ju nü kiulongthsü-binkiu khimtan ah; mihmüthsüm tüsho thiyuro nü miro müngüh yüchoh.

¹⁵ Mihtsürü sherünü asühachih düsheak mükheahlanü müngühmühi! O Atungpuh , arünü nü bekhi ayin ching tsahchoh.

¹⁶ Arünü nü mung ching nimung amuyung asühachihchoh, tüsho nü thiyuro-lungki ching arübo shuhkih-a lah.

¹⁷ Tümüde nü a isa sühmüh müretahkhi lah, tüsho nü muzho ching nünü isa akuk ngüshih.

¹⁸ Tümüde isa tsung ju Atungpuh yo ah, tüsho isa kiulongthsüpuh Israel Amüsüh Khülang kilim lah.

Thrünpuhnü David ki Alokhikhi

¹⁹ Judüki nünü nü yo amüsüh khülang ki michih ching asuk, tüsho tha: “Inü wuto kilim arung jihdo; inü mihtsürü bolungnü mokhitkhi shuhkihdo.

²⁰ Inü I yamlarü David ngüdo; inü I yo amüsüh müdangkenü api mujude-mokhitdo,

²¹ I khah hode api labah; I binnü api düküngshihbah.

²² Thiririnü api mürükyuk, yungsho mihbukmuyuk tsührünü api müthsümüchi.

²³ Inü ariribo amiki kinga lungshihbah, tüsho api thraneanrü rümshihbah.

²⁴ Tüshe I thiyuro tüsho I mihmüthsüm api lung labah, tüsho kamruhroro inü api akuk ngüshihbah.

²⁵ Inü api khah keto kumung, tüsho api khah tsülim ayungbo kumung lashihbah.

²⁶ Apinü I ki zhibah, ‘Nü I buh, I Thrünpuh, tüsho I akhümkhit lungto.’

²⁷ Inü api I tsührü adüjirü, alomi kiulongthsürübo kheaknü achangbe thsüshihbah.

²⁸ Inü I mihmüthsüm lünnü api thsungkheak zojihbah, tüsho I tangzüng api kheak düküngde alabah.

²⁹ Inü api müjih she lünnü rünkhiungshihbah, tüsho api kiulongthsü-binkiu yinmi nimungbo nangde alashihbah.

³⁰ Api tsührübonü I yakzan bahyuksho tüsho I yakzan thsükhibo ching mütsahsho,

³¹ arünü I yakzan thsükhibo thsümünimsho tüsho I yukhümbo muzosho,

³² inü arü neakbo dün thsümüchibah; arünü amülimbo rhimokhi dün inü arü thsünüshihbah.

³³ Judüalalashe I mihmuzho inü api kheaknü shahde muluakhin, yungsho I thiyuro lakhi mülade müthsüshih.

³⁴ Inü I tangzüng müthsümünim, yungsho I mün chingnü wukhiukkhi yu mümüthri.

³⁵ Khülang ki inü I amüsühnü thiyuchihchim; inü David ki akeangyu mütha;

³⁶ api müjih lünnü rünkhiungbah, tüsho api kiulongthsü-binkiu ani nangde I miki labah;

³⁷ ha lünnü khinu nangde, thüning ching thiyuro thiyumütsan labah.”

Kiulongthsüpuh Kukkhi Tüzhokhi

³⁸ Tüshe nünü bahyukdo tüsho thraneando, nünü mujude-mokhitkhi kheak nü bukakhiukdo.

³⁹ Nünü nü yamlarü ki tangzüngkhi thsümünimdo; nünü api kuthran asungthulung ching bahkhinü müneanshihdo.

⁴⁰ Nünü api rhübo alala thokheamjih; nünü api chipibo thsümünimjih.

⁴¹ Limro tsahhorü alalanü api kukruk ahühchoh; anihbuh yamhingrübo ki api a münedung kamdo.

⁴² Nünü api azhihrü khah tsülim shuhkihdo; nünü api riribo alala asühachihshih.

⁴³ Nünü api thsühnukbo akeangkeang kamshih tüsho thirithsü ching api kukabahshih.

⁴⁴ Nünü api müretah kheamshih, tüsho api kiulongthsü-binkiu alo kheak jipa bahjih.

⁴⁵ Nünü api athunu nimungbo khihshih; nünü mungchihnü api lüpdo.

Bekhitpü Tamkhüntamnü

⁴⁶ Külokhüh, Atungpuh ? Nü lünnü ajikba de? Nü mulong zhipzhip mo nangde atakba de?

⁴⁷ I kim küde khihlanü lümkhitang; tümüde nünü mihtsürü tsührübo akeangkeang ching thrünkhea?

⁴⁸ Tümü mihtsürünü ashepü müngüde lakhukla? Apinü kiuyuk wu chingnü nihbuh rhangdung bekhitkhukla de?

⁴⁹ Atungpuh , nünü David ki thiyuro ching thiyuchihchimkhi, akhuhbe nü mihmuzho küching la?

⁵⁰ O Atungpuh , nü yamlarü mükhemükimkhi, mihtsürü ahihdonü athruaji arümkhi lümkhitang.

⁵¹ Nü riribonü nünü mujude-mokhitkhi kiulongthsüpuh mükhemükimchoh, O Atungpuh ; arünü api yüpung alala ching mükhemükimdo.

⁵² Lünnü Atungpuh shiang! Amen! Amen!