MUNGSHIKHÜN 86 - AMÜSÜH HÜM CL Bible (BSI)

Arung thsungkheak Tamkhüntamnü

¹ O Atungpuh , aniang tüsho I ki alojang; tümüde I zhochihrü tüsho müthsümülarü ah;

² I rhangdung küma lashang, tümüde I amüsüh ah; nü I Thrünpuh; nü kheak kinkhi nü yamlarü khümkhitang!

³ I ki müthsümang, O Atungpuh , tümüde inü nimung amuyung nü ki zhichoh.

⁴ Nü yamlarü me asühshang, tümüde O Atungpuh , inü I me shuhkihchoh.

⁵ Tümüde Atungpuh , nü tsülah tüsho neak bahjihpü thsakhamlah, tüsho nü ki jirü alala kilim mihmüthsüm ching suhdahlah.

⁶ I tamkhüntamnü sojang, O Atungpuh , mihmüthsüm thsungkheak zhikhi anijang.

⁷ I küpkhuk nimung inü nü ki jibah, tümüde nünü I ki alojihbah,

⁸ Thrünpuhbo lung nü nangde she müla, O Atungpuh ; tümüde rhimonü she nü rhimo kheak makekhuk.

⁹ Nünü athrünkhi trükshihbo alala arübah tüsho nü ki khukningbah, tüsho nü mung müretahbah.

¹⁰ Tümüde nü ato ah, tüsho amüyinsahbe rhimochoh; nü lang Thrünpuh ah.

¹¹ I ki nü limro thsangyuang, O Atungpuh ; inü nü thiyuro ching tsahbah; nü mung trepü thsüde I mulong arihshang.

¹² O Atungpuh , I Thrünpuh, I mulong alalanü inü nü shibah, tüsho inü lünnü nü mung müretahshihbah.

¹³ Tümüde I kilim nü amüthsüm ju ato ah, tüsho Ashe-lomi asük chingnü nünü I me bekhit.

¹⁴ Akükheangrünü I azhihde wusudo, O Thrünpuh; mihbukmuyuk mihtsürü botonü I rhangdung yimchoh, tüsho arü miki nü mülashih.

¹⁵ Tüshe O Atungpuh , nü a muzhomüyi tüsho amüthsüm ah, arünnü bukakhiukchoh, amuzho tüsho thiyuro ching muzhomopungde lah.

¹⁶ O, I kilim rholoang, tüsho I kheak mihmüthsüm laang! nü yamlarü kilim nü sühmüh jihang, tüsho nü yamlaberü tsührü khümkhitang.

¹⁷ I ki atsü thsungkheak amütsan khülang huhang, junangde sherünü I thraneanchonü ju ngübah tüsho achihbah, tümütüsho Atungpuh , nünü I rung tüsho I mulong shukheamjih.