MUNGSHIKHÜN 85 - AMÜSÜH HÜM CL Bible (BSI)

Trükshih Rungpü Tamkhüntamnü

¹ Atungpuh , nünü nü lomi muzhode lado; nünü Jakob aramrü belode arüdo.

² Nünü nü mihtsürü mülimkhi bahjih; nünü arü neak alala lüpdojih.

³ Nünü nü mulong zhipzhip alala lude tso; nünü nü bukmükekhi chingnü rholo.

⁴ Isa laloshang, O isa akhümkhit Thrünpuh, tüsho isa kilim nü bukakhiukkhi kheamshang.

⁵ Nünü isa ki lünnü bukakhiukba de? Lün alala ching nü bukakhiuk laba de?

⁶ Nü mihtsürünü nü lung asühachihpü thsüde, nünü isa müthsüphuloba de?

⁷ Isa ki nü amüthsüm huhang, O Atungpuh , tüsho isa ki nü akhümkhit mülüjang.

⁸ Atungpuh Thrünpuhnü tümü asukbanü inü anibah, tümüde apinü api mihtsürü tüsho amüsührü ki mungtsü asukbah; tüshe arü makhakhi lim dürholoshih.

⁹ Tsükjide api trerü ki api akhümkhit thüninde lah, junangde müretahkhi isa lomi ching labah.

¹⁰ Mihmüthsüm tüsho thiyuro rukhüh shoruachihdo; thiyuro-lungki tüsho mungtsü müthsüpachihdo.

¹¹ Alomi chingnü thiyuro mukhuhbah, tüsho thiyuro-lungkinü yinmi chingnü abinkhia kheahbah.

¹² Tümü atsüanü Atungpuhnü ajihbah; tüsho isa lonü alü thsükhi akhiukshihbah.

¹³ Thiyuro-lungki ju api müngüh yübah, tüsho api jing düküpü limro thsakhambah.