MUNGSHIKHÜN 84 - AMÜSÜH HÜM CL Bible (BSI)

Thrünpuh Yam Lümrhihkhi

¹ Nü arüngkhimyam küdükhüh atsü a, O Wuto Atungpuh !

² Atungpuh arüngyam thsungkheak I menü künsahde kamchoh; I mulong tüsho I shihnü arhang Thrünpuh thsungkheak zhichoh.

³ Khüjak she thüyam ngüdo, tüsho kiurürüt she anunu khukhitpü asap lah– nü kingaün sadam dangpung thüninde, O Wuto Atungpuh , I kiulongthsüpuh tüsho I Thrünpuh.

⁴ Sherü nü yam ching lanü müngühmühi; arünü judü lang nü shijihbah.

⁵ Mihtsürü shepü sühmüh nü kheak la, shepü mulong amüsüh-hantsahpü lanü müngühmühi.

⁶ Arübo Baka jindükhün hode ayüchoki, arünü ju ke-bukpung kamshihchoh; mumükin tsüngbonü ju kekhipbo bede zhidochoh.

⁷ Arübo sühmüh lade yüchoh; arü mihbüm abannü Zion ching Thrünpuh miki yüchoh.

⁸ O Atungpuh Wuto Thrünpuh, I tamkhüntamnü sojang; aniang, O Jakob Thrünpuh!

⁹ O Thrünpuh, isa tsung kheahang, tüsho nünü mujude-mokhitkhi miro kheah kheahang.

¹⁰ Nü arüngyam ching lakhi nimung khülang ju püpü lim chithürü kheaknü atsübe; mihbukmuyukrü khimyambo ching lapü dün a I a Thrünpuh yam ching ripit-neakrü thsübah.

¹¹ Tümüde Atungpuh Thrünpuh ju ani tüsho tsung ah; Atungpuhnü amüthsüm tüsho müretah jihbah; lungkide atsahrü kheaknü apinü atsü tümü she mutholo.

¹² O Wuto Atungpuh , mihtsürü shepü nü kheak kinchonü müngühmühi!