MUNGSHIKHÜN 83 - AMÜSÜH HÜM CL Bible (BSI)

Israel Riri Kukpü Tamkhüntamnü

¹ Malande düla, O Thrünpuh; nü mungtsü dütholo, tüsho zhikde düla, O Thrünpuh!

² Kheahang, nü riribo arhunganimchoh; tüsho nü thraneanrünü arü ku shuhkihdo.

³ Arünü nü mihtsürü azhihde ramde lümkhi thsüchoh; nünü akümdokhi azhihde arünü azhihchoh.

⁴ Arünü tha, “Arang, tüsho nüsanü arü trükshih chingnü dükheakshihanü, junangde Israel mung kheaküa mülümkhit.”

⁵ Arü lümkhi ching arü arihdo tüsho rukhüh thsüde nü azhihchoh:

⁶ Edom tüsho Ishmaelrü khimyambo; Moab tüsho Hagarrü;

⁷ Geba, Amon, tüsho Amalek; Tair ching larü bede Filistia;

⁸ Asiria she arü lung arihdo; arünü Lot tsührübo rungdo.

⁹ Nünü Kishon Ayung ching Midiarü, Sisera tüsho Jabin kheak rhimokhi nangde arü kheak rhimoang.

¹⁰ Sherü Endor ching dükheak tüsho alo kheak sünit mujung nangde kam.

¹¹ Nünü Oreb le Zeeb, Zeba tüsho Zalmunna kheak rhimokhi nangde arü limberü ki rhimoang,

¹² sherünü tha, “Isanü Thrünpuh yo rimlopung isa yamalo thsüpü luanü.”

¹³ O I Thrünpuh, arübo chitmühean asungthulung nangde, apung müngüh müneang nangde kamshang!

¹⁴ Monü sang aniukhi nangde, tüsho motrunü müzüngbo aniukhi nangde,

¹⁵ nü chinthrümnü arü müshamang, tüsho nü tsüngpungtsüngpungnü arü müzünang.

¹⁶ Arü miro achih ngükhinü mishang, junangde arünü nü mung yimbah, O Atungpuh .

¹⁷ Arübo lünnü achih tüsho lümchihyuk ngüshang; arübo achih ngüshang tüsho dükheakshang,

¹⁸ junangde arünü nü mung ju lang Atungpuh ah de, nü alomi alala kurungkheak Khide Achang mükheahbah.