MUNGSHIKHÜN 80 - AMÜSÜH HÜM CL Bible (BSI)

Trükshih Lalopü Tamkhüntamnü

¹ Aniang, O Israel neakbuh, nü shepünü mihnu boto nangde Josep becho; nü shepü cherubim dükeak zhingzhingde la!

² Ephraim, Benjamin tüsho Manase müngüh nü sühmüh akhiukang, tüsho arübah isa khümkhitang!

³ Isa laloshang, O Thrünpuh; nü miro yinshang tüsho isa khümkhitang!

⁴ O Atungpuh Wuto Thrünpuh, nü mihtsürü tamkhüntamnü azhihde külokhüh nü bukakhiukba?

⁵ Nünü isa mulong rozhak tsühshih, chike pung ato yungshih.

⁶ Nünü isa yamhingrü ki thirithsüshih, tüsho isa riribonü arü bolung münejihchoh.

⁷ Isa laloshang, O Wuto Thrünpuh; nü miro yinshang, tüsho isa khümkhita labah!

⁸ Nünü Ijip chingnü kurungasoliu khülang lubah arü; nünü trükshihbo yankhit tüsho ju khim.

⁹ Nünü ju thsungkheak alo wochakkhit, tüsho aying sükde chinyukshih, tüsho alomi mide kam.

¹⁰ Alammenü awungbo tüsho akhahbonü cedar atobo alamdo.

¹¹ Anihbenü akhahbo keto ching tüsho adübeakbo Ayung ching yüshih.

¹² Tümüde atsahhorü alalanü kurungaso rhoa lupü thsüde nünü ha chipi ayünkhi lukkheamkhea?

¹³ Shihneakbonü ju jungnakchoh, tüsho mütüm shiwühbonü jurü tsühchoh.

¹⁴ Isa kilim alode arang, O Wuto Thrünpuh; yinmi chingnü abinkhia kheahang, tüsho ha kurungasoliu rhuakheahang,

¹⁵ nü khah tsülimnü akhimkhi tüsho nü thsungkheak akhah düküngshihkhi kurungasolu.

¹⁶ Ha monü taka lah, ha lipkheama lah; nünü athürühkhi ching arübo dükheakchoh.

¹⁷ Nünü nü thsungkheak mokhitkhi mihtsürü tsührü kheak nü khah tsülim lashang.

¹⁸ Judüki isanü nü kheaknü rholode mutso; isa thsüphulojang, tüsho isanü nü mung jianü.

¹⁹ Isa laloshang, O Wuto Atungpuh Thrünpuh; nü miro yinshang, tüsho isa khümkhita labah!