MUNGSHIKHÜN 78 - AMÜSÜH HÜM CL Bible (BSI)

Thrünpuh tüsho api Mihtsürü

¹ O I mihtsürü, I yakzan aniang; inü athakhi aniang.

² Inü shihdanglimyu ching I mün khimshuhbah; inü adüso yo rama lakhi thabah,

³ küpü isanü sode tüsho mükheahkhea, tüsho isa bebuhrünü isa ki thakhea.

⁴ Isanü jurü isa tsührübo ki müram, isanü Atungpuh mung shipü tüsho api sühmüh tüsho apinü amüyinsahbe rhimokhibo arübe lün ki thabah.

⁵ Apinü Jakob thsungkheak thiyuzüngbo thsü tüsho Israel ching yakzan zo, küpü apinü isa jipürü ki thiyukhüm jih, junangde arü tsührübo ki thsangyupü lakheah;

⁶ junangde azübepü lakhi tsührübonü lünnü jurü mükheahbah, tüsho arü asürübah tüsho arü ki thabah.

⁷ Judüki arünü Thrünpuh kheak kinbah tüsho api rhimobo amüsüh mümih tüshe api yukhüm bo zobah.

⁸ Arübo arü jipürü anihnih tüsho azhihkhi lün arü mulong tüsho me Thrünpuh ki thiyuro mülakhi nangde mülade alabah.

⁹ Ephraim mihtsürübo thirithsü zülu lu tüsho sanglühbo hanbah keochih nimung rholode tso.

¹⁰ Arünü Thrünpuh ki tangzüngkhi muzo; arünü api yakzanbo ching tsahpü thsunglo,

¹¹ tüsho arünü apinü arü ki huhkhi amüyinsahbe rhimokhibo mihabah.

¹² Apinü Ijip lomi Zoan mükeak ching arü jipürü miki amüyinsahbebo rhimo.

¹³ Apinü keto azüshih tüsho arü hoshih; tüsho apinü kebo ju rhübo nangde zhipshih.

¹⁴ Apinü arü animung amonü, tüsho are amuyung mo ayinnü be.

¹⁵ Apinü sunglo ching lungtobo trüshih, tüsho ayungbo nangde suhdahde ayungpü jih.

¹⁶ Apinü lungto chingnü yungzü akhiukshih, tüsho ayungbo nangde kebo bukshih.

¹⁷ Tüshe arünü sunglo ching Khide Achangbuh azhihde neak alü yihbeak.

¹⁸ Arünü akünkhi tsühyungbe kheangde akhekhungnü Thrünpuh rükaki.

¹⁹ Am, arünü Thrünpuh azhihde asuk; arünü tha, “Thrünpuhnü sunglo ching dükhüm khülang thsakhamkhukla de?

²⁰ Kheahang, apinü lungto kheak rhap, junangde kebo bukkhit, tüsho yungzübo zhikhiukde buk. Apinü yikhap she ajihkhukba shi? Apinü mihtsürü thsungkheak shih jihkhukba shi?”

²¹ Jumonü Atungpuhnü ha so tüsho mulong zhipzhipde alakheah; jumonü Jakob azhihde mo khülang takkih, tüsho Israel azhihde bukakhiukkhi arü,

²² tümütüsho arünü Thrünpuh kheak mükin, tüsho api akhümkhit ching akin müla.

²³ Tütüshe apinü akulim amobo ki thiyukhüm jih, tüsho thüning ripitbo khimshuh,

²⁴ apinü atsühshihpü arü kheak manna akishih, tüsho arü kilim yinmi yikhap jih.

²⁵ Mihtsürübonü yunirübo jim tsüh; Thrünpuhnü arü künkhi alala jih.

²⁶ Apinü aniakhiuklim pungnü yinmibo ching yünshih, tüsho api wunü düjinglim pung bekhit;

²⁷ apinü shih she arü kheak asungthulung nangde, jinyean loyi kheak aphinkhi wuhnubo nangde akishih.

²⁸ Tüsho apinü jurübo arü binkheampung phulung, arü lapung alala mühide akishih.

²⁹ Junangde arünü tsüh tüsho tsüde bukthsü, tümüde apinü arü künkhi jih.

³⁰ Tüshe arü shihmürhükkhi mükheamyide, arü mün ching tsühyungbe lachoki,

³¹ Thrünpuh bukakhiukkhi arü kheak arü, tüsho arü bolung sühmüh larü amokhitkhi Israel mihtsürübo laksah.

³² Hade thsüthsü she arünü neak yihbeak; tüsho api amüyinsahbe rhimobo arünü mükin.

³³ Jumonü apinü arü nimungbo sheak khülang nangde, tüsho arü kambo mihtrebe ching kheamshih.

³⁴ Küyimki apinü arü khürü laksahkheanü, aninga larünü api yim; arünü mulong müthri tüsho azhihayihde Thrünpuh yim.

³⁵ Judüki arünü Thrünpuh ju arü lungto, tüsho Khide Achang Thrünpuh ju arü rhokhitrü ah de lümkhit.

³⁶ Tütüshe arünü arü münnü api ki thsüpkhilukhi; tüsho arü mulonü akeangyu tha;

³⁷ tümüde arü mulong api ki müdüküng, yungsho api ki tangzüngkhi ching thiyuro müla.

³⁸ Tüshe api amüthsümnü mide arü mülimkhibo neak bahjih, tüsho arü müdükheakshih. Kim aban api bukakhiukkhi tuklo, tüsho api mulong müzhipzhip.

³⁹ Tümüde arübo ju shih, tsoabahbe sheak khülang tüsho alode marü de apinü lümkhit.

⁴⁰ Küdükhüh ki arünü sunglo ching api azhihkhea, tüsho loshelo ching api mulong tukthsüshihkhea!

⁴¹ Arünü alochode api rükaki, tüsho Israel Amüsüh Khülang bukakhiukshih.

⁴² Arünü arü riri kheaknü arhokhitkhi nimung, api wu mülümkhit,

⁴³ küyimki apinü Ijip ching api amütsanbo, tüsho Zoan mükeak ching amüyinsahbebo rhimokhea;

⁴⁴ arü ayungbo tüsho kenübo thiyih kamshih, junangde arünü muyungkhuk.

⁴⁵ Apinü arü bolung somünakbo yüshihbah arü muyushih, tüsho kheangbonü arü thsümünim.

⁴⁶ Apinü arü hibo lungbünbo kilim, tüsho arü khisahkhi tangkhobo kilim jih.

⁴⁷ Apinü arü kurungasobo arunü, tüsho khubasodungbo thüwünnü thsümünim.

⁴⁸ Apinü arunü arü moshibo tüsho tsüngnü mihnubo yuksah.

⁴⁹ Apinü arü bolung athsümünim yunirü arüshihbah arü kheak api mulong zhipzhip, bukakhiuk, tüsho küpkhuk yükihshih.

⁵⁰ Apinü abukakhiukpü limro thsakham; apinü arü shepü chingnü maningshih tüshe arüm kilim arübo jih,

⁵¹ tüsho Ijip ching zübekhi adüjirü alala, Ham khimyam ching arü münü akhuhbe dükheakshih.

⁵² Tüshe apinü anihbuh mihtsürü namfimihnunu nangde mikhuh yüshih, tüsho mihnu boto nangde sunglo ching be;

⁵³ apinü arü tsüde be, junangde arü mütre; tüshe ketonü arü riribo zhidoabah.

⁵⁴ Tüsho apinü arübo amüsüh aredung, akhah tsülimnü alukhi ha wung kheak bede arü.

⁵⁵ Apinü trükshihbo arü müngühnü yankhit tüsho arü kilim arü lobo yamrüplurüp jih; apinü Israel trükbo arü khimyambo ching lashih.

⁵⁶ Tütüshe arünü Thrünpuh rükaki tüsho Khide Achang azhih; arünü api yakzan thsükhibo muzo,

⁵⁷ tüshe rholo tüsho arü bebuhrü nangde thiyuro mülade rhimo; mümukhiungkhi sanglüh nangde arünü chimphürihde tso.

⁵⁸ Tümüde arünü arü achang dangpungbonü api bukakhiukshih, tüsho arü mejakbonü api mükthsüde kamshih.

⁵⁹ Küyimki Thrünpuhnü ha sokhea, api mulong zhipzhipde kam, tüsho Israel khide thraneanabah,

⁶⁰ junangde apinü Shilo ching arüngkhimyam, arü bolung zokhi khimyam bahyuk,

⁶¹ tüsho apinü api wu tüsho müretah amütsan lakhi tangzüng sangdan isa riribonü yankhia lushih.

⁶² Apinü api mihtsürü nukshang kilim jih; tüsho api yamrüplurüp kheak bukakhiuk.

⁶³ Monü arü athunu mihtsürübo aniuabah, tüsho anünürübo mürhangshih.

⁶⁴ Arü yo amükeamrübo nukshangnü keam, tüsho arü niuberübonü mütüzho.

⁶⁵ Judüki Atungpuh ju ayapkhi chingnü nangde, sühmüh larü mihtsürü yukhunü müshanga arungshihkhi nangde asürü.

⁶⁶ Tüsho apinü ariribo yanloa tsoshih; apinü arü akheam müla achih ngüshih.

⁶⁷ Tüshe apinü Josep khimyam bahyuk, tüsho Ephraim trük mumokhit,

⁶⁸ tüshe apinü Juda trük, apinü muzhokhi Zion Müzüng mokhit.

⁶⁹ Tüsho apinü achangbo nangde, apinü lünnü thsüa zokhi alomi nangde api arüngakopung thsü.

⁷⁰ Apinü ayamlarü David mokhit, tüsho namfimihnu bolungnü api bea lu;

⁷¹ namfimihnu neakde alakhi chingnü api mihtsürü Jakob, api yamrüplurüp Israel neakshihpü api bede arü.

⁷² Jumonü apinü alungki mulongnü arü neak, tüsho yeanzode arü be.