MUNGSHIKHÜN 75 - AMÜSÜH HÜM CL Bible (BSI)

Thrünpuh ju Mahkhaprü

¹ Isanü nü ki makshe jihchoh, O Thrünpuh, isanü makshe jihchoh! Isanü nü tokhi zhiyukchoh tüsho nünü amüyinsahbe rhimokhi dünkheak thachoh.

² Küyimki inü kim dükde amokhitbanü, inü alungkinü mahkhapbah.

³ Alomi tüsho ju ching lakhi alala niukrua lah; inü dungjingbo düküngde khimlah.

⁴ Inü akükheangrü ki tha, “ Kükheangde dürhimo, tüsho mihbukmuyuk ki, ‘ Juh düshuhkih.

⁵ Nü juh achang kheak düshuhkih; hung chungthülangde dasuk.’ ”

⁶ Tümüde ashuhkihkhi ju aniakhiuklim yungsho aniyüzahlim yungsho düjinglimnü marü.

⁷ Tüshe Thrünpuh ju mahkhaprü ah; apinü khülang keamshihchoh, tüsho püpürü shuhkihchoh.

⁸ Tümüde Atungpuh khah ching pung khülang lah, tüsho yukhu ju amürüm; ju tsüde rhuzhihzhih, tüsho apinü dungkhitchoh; tüsho alomi mihbukmuyuk alalanü mütrünkhide ayungbah.

⁹ Tüshe inü lünnü akhipkhitbah, inü Jakob Thrünpuh kilim mungshi khünbo thsübah.

¹⁰ Mihbukmuyuk juhbo alala inü alipshakbah, tüshe thiyuro-lungkirü juhbo shuhkihbah.