MUNGSHIKHÜN 74 - AMÜSÜH HÜM CL Bible (BSI)

Trükshih thsungkheak Tamkhüntamnü

¹ O Thrünpuh, tümüde nünü isa lünnü bahyuka la? Tümüde nü mihtsürü azhihde bukakhiukcho?

² Nünü adüsonü amokhitkhi nü borü, nü yamrüplurüp thsüpü rhokhitkhi lümkhitang! Nü lakhi Zion Müzüng lümkhitang.

³ Akheam müla thsümünimpü nü jing shuhkihang. Thiririnü arüngakopung ching lüpdükhi thsümünimdo.

⁴ Nü shorupung dangpung ching nü riribonü ahochoh; arünü amütsanbo thsungkheak arü riphinbo khimchoh.

⁵ Arübo ju sang jangkhi ching awü shuhkihkhi mihtsürü nangde lah.

⁶ Kheakü arünü sang-müchinkhibo ju awübo tüsho yümlungbonü khülang kinü alala kingkheamchoh.

⁷ Arünü nü arüngakopung kheak mo thsahkihdo; arünü nü mung lapung alo kheak müneando.

⁸ Arünü arü mulong ching thachoh, “Isanü arü rukhühnü thsümünimanü.” Arünü lomi ching Thrünpuh shorupung dangpungbo alala takabahdo.

⁹ Isanü isa yo amütsanbo müngü; kheaküa wukihrü müla; yungsho külokhüh labeanü amükheahrü isa bolung müla.

¹⁰ O Thrünpuh, külokhüh nü azhihrünü nü münejihba? Thiririnü lünnü nü mung mükhemükimba de?

¹¹ Tümüde nü khah tsülim tuklocho? Nü khüh kheaknü yihkhitang tüsho arü thsümünimang.

¹² Tümütüsho adüsonü Thrünpuh ju I kiulongthsüpuh, alomi bolung ching akhümkhit rhimochoh.

¹³ Nünü nü sühmühnü keto azüshih; nünü ketobo ching keto phurutobo ku yihshak.

¹⁴ Nünü Leviathan kubo zünak, nünü api ju sunglo ching shiwühbo kilim tsühyungpü thsüde jih.

¹⁵ Nünü kenü tüsho keking khimshuh; nünü ayung atobo ngahshih.

¹⁶ Nimung nü yo, azhing she nü yo; nünü ayin tüsho ani thsakham.

¹⁷ Nünü alomi aredung alala khim; nünü muzhu tüsho tsüngkam thrün.

¹⁸ O Atungpuh , thiririnü keangrümünechoh, tüsho makharü mihtsürünü nü mung mükhemükimdo de lümkhitang.

¹⁹ O, nü yo guduru rhangdung mütüm shiwüh kilim düjih; nü yo zhochihrü rhangdung lünnü dümih.

²⁰ Tangzüngkhi wüntre jihang; tümüde alomi amiting dangpungbo athsümünimnü milah.

²¹ O, junoa larü achih ngüa alode darüshih! Zhochihrü tüsho müthsümülarünü nü mung shishang.

²² Asürang, O Thrünpuh, nü dünkheak leangloang; makharü mihtsürünü nü nimung aban münejihkhi lümkhitang.

²³ Nü riribo düsheak dümih; nü azhihde arhunganimde wusukhi mutuklode alü kamchoh.