MUNGSHIKHÜN 7 - AMÜSÜH HÜM CL Bible (BSI)

Thiyuro thsungkheak Tamkhüntamnü

¹ O Atungpuh I Thrünpuh, inü nü kheak tsoyukchoh; I müshamrü alala chingnü I khümkhitang tüsho bekhitang,

² jude yungsho kekhüzünü nangde arünü I zamthünakbah, tüsho shenü müyankhide adütre kamde thomüzütbah.

³ O Atungpuh I Thrünpuh, inü ha rhimoa lasho: I khah ching amülim lasho,

⁴ inü I müyambuh kheak amütsü rhimoa lasho yungsho amütsan mülade I riri yankhia lua lasho,

⁵ thiririnü I müshamshang tüsho I tholoshang, tüsho apinü I rhangdung alo ching juyukshang, tüsho I asungthulung ching yapshang.

⁶ O Atungpuh , nü bukakhiukkhi ching asürang, I riribo bukmüshakkhi azhihde nü jukmusuang; asürang, O I Thrünpuh; nünü mahkhap khülang thsakhamlah.

⁷ Mukhunga lakhi mihtsürübo nü mükamde arüshang; tüsho achang chingnü arü kurungkheak yakzan zhimang.

⁸ Atungpuhnü mihtsürü mahkhapchoh; O Atungpuh , I thiyuro-lungki tüsho I kheak lakhi thiyuro yande I mahkhapang.

⁹ O mihbukmuyuk amütsü rhimo akheam thsüshang, tüshe thiyuro lashang; tümüde thiyuro-lungki Thrünpuhnü mulong tüsho lümkhi rükakheahchoh.

¹⁰ Thrünpuh ju I tsung ah; apinü mulong alungki larü khümkhitchoh.

¹¹ Thrünpuh ju thiyuro mahkhaprü ah, tüsho Thrünpuhnü mihbukmuyuk kheak animokhün bukakhiukchoh.

¹² Anihbuhnü murholosho, apinü nukshang zükhitbah; api sanglüh hünkihde thsakhamchoh.

¹³ Apinü ashebe thsühnuk thsakhamchoh; mo kihkhi api hühzo thsüchoh.

¹⁴ Shepü amütsü-rhimonü mübünkeangde kamcho, tüsho küpkhuk lashihchonü akeangyu zübechoh.

¹⁵ Sherünü alokhün kiuchonü arünü akiukhi shingkung ching keamyukchoh.

¹⁶ Api rhimo-amütsü anihbuh kheak arülochoh, tüsho apinü athsümünimkhi aku kheak akihchoh.

¹⁷ Api thiyuro-lungki yande inü Atungpuh kilim makshe jihbah, tüsho Khide Achang Atungpuh shijihde inü khün thsübah.