MUNGSHIKHÜN 68 - AMÜSÜH HÜM CL Bible (BSI)

Trükshih Akuk Khün

¹ Thrünpuh asürüshang, api riribo müzütshang; api thraneanrü alala api müngüh tsoshang.

² Mokhüh kita tsoshihkhi nangde, arü yana tsoshang; thürip mo miki niuabahkhi nangde, mihbukmuyuk ju Thrünpuh miki dükheakshang.

³ Tüshe thiyuro-lungkirü asühshang; arübo Thrünpuh miki hodakde asühachihshang.

⁴ Thrünpuh ki api mung müshikhi khün thsang; shepü amobo kumung tsahchonü api ki achangnü khün thsang; api mung ju Atungpuh , tüsho api miki asühachihang.

⁵ Mürerü abuh tüsho khimoberü tsungdojihrü Thrünpuh ju api amüsüh lapung ching lah.

⁶ Thrünpuhnü bahyuka larü ki alashihpü thüyam jihchoh; apinü aramrübo asühpü zuzu ching bekhitchoh; tüshe azhihrübo a akung lo ching lachoh.

⁷ O Thrünpuh, küyimki nü mihtsürü müngüh, sunglo hode nü yükhea,

⁸ alomi ajan; thüningbonü she Thrünpuh miki tsüng akishih; Sinai she Israel Thrünpuh miki aphap.

⁹ O Thrünpuh, nünü muzhomopungkhi tsüng arüshih, ju hode keaksah-a lachoki nü yamrüplurüp rhüngrhüngshih.

¹⁰ Nü mihtsürübo ju ching lachoh; O Thrünpuh, nü tsükhi chingnü nünü zhochihrü kilim jih.

¹¹ Atungpuhnü thiyukhüm jih; ju zhiyukpü boto ato lakheah:

¹² “ Kiulongthsürübo le bonungrübo alihde tsochoh, tüsho aliberübo thüyam ching aninga larünü ayankhikhi kukruk chamchoh.

¹³ Nüsa namfimihnu boto bolung lalashe, nüsa shotoyinchinü alüpdokhi müthrithrümpü ghidükeangbo, tüsho anihbe moghidung suna kelülü nangde alabah.”

¹⁴ Küyimki Wutonü ju ching kiulongthsürübo müzütshihkhea, Zalmon kheak phürüm keamkhi.

¹⁵ Bashan müzüng ju Thrünpuh müzüng ah; amujuk ahihdo lakhi müzüng ju Bashan müzüng ah.

¹⁶ Amujukbo ahihdo lakhi müzüng, tümüde nünü mükthsüde kheahcho? Ha Thrünpuhnü alapü künkhi müzüng ah; am, ju ching Atungpuh lünnü alabah.

¹⁷ Api lung khora-lolungbe chithürü ahihdo bebah Sinai chingnü amüsüh dangpung lim Atungpuh arüchoh.

¹⁸ Aramrübo api lung bebah achangbo kheak yükihchoh; azhihrü mihtsürübo kheaknü she apinü thsambahbo leangkhichoh, Atungpuh Thrünpuh ju ching labah.

¹⁹ Nimung aban isa hahmülang hanbuh Atungpuh shiang; Thrünpuh ju isa akhümkhit.

²⁰ Isa Thrünpuh ju akhümkhit Thrünpuh; Atungpuh isa Thrünpuhnü ashepü chingnü isa khümkhitchoh.

²¹ Tsükjide Thrünpuhnü api riri kubo, arü neakbo ching yürü kuyü kihkhi thangphülang zünakbah.

²² Atungpuh nü tha, “Inü arübo Bashan chingnü belode arübah, inü arübo keto asükbo chingnü belode arübah,

²³ junangde nüsa müphünü arü thiyih ching jungbah, tüsho nüsa yihnubonü arü künthülün müleakbah.”

²⁴ I Thrünpuh, I kiulongthsüpuh arüngakopung ching dungde ayüzahkhi arünü ngüdo, O Thrünpuh.

²⁵ Khün thsürübo mikhuh yüdo, khün-khungbe kingrü ju dunglim yande yü; arü dükeak ching züpzüppü kingrü anünürübo lakheah.

²⁶ Mukhungmüdan ato ching Thrünpuh shiang; nüsa Jakob tsühsoniuso alala, Atungpuh shiang.

²⁷ Akhuhde trük aninibe Benjamin, jushu Juda limberübo arü khunungbo bede, ju khin Zebulun tüsho Naphtali limberübo arüchoh.

²⁸ O Thrünpuh, nü wu jiang; O Thrünpuh, nünü püpüki rhimokhi nangde isa ki nü sühmüh huhang.

²⁹ Jirusalem ching nü arüngyam dünkheaknü, kiulongthsürübonü nü kilim thsambahbo handarübah.

³⁰ Khiukbo ching shiwühbo, mihtsürübo yo moshipung nunubo, mihbüm aban azhihayihde shotoyinchi müjihyi khiungde thürühang. Thirithsü ching asührü mihtsürübo müzütshang.

³¹ Limberübo Ijip chingnü akhiukbah; Ethiopianü nahde anihbe khahbo Thrünpuh kilim chungkihbah.

³² Nüsa alomi kiulongthsübo, Thrünpuh ki khün thsang; O, Atungpuh ki mungshikhünbo thsang,

³³ jipü yinmibo kheaknü yinmi kheak tsahbuh kilim; kheahang, apinü anihbuh wuto düsheak arüshihchoh.

³⁴ Thrünpuh wu zhiyukjang; api thudakkhi Israel kurungkheak lah, tüsho api sühmüh amobo ching lah.

³⁵ O Thrünpuh, nü a nü amüsüh dangpungbo kheaknü alü atrebe ah. Israel Thrünpuh ju api mihtsürü kilim sühmüh tüsho wu jihbuh ah. Thrünpuh shiang!