MUNGSHIKHÜN 64 - AMÜSÜH HÜM CL Bible (BSI)

Kümdopü Tamkhüntamnü

¹ O Thrünpuh, I atsangkhi ching I düsheak sojang; thiriri trekhi chingnü I rhangdung küma lashang.

² Mihbukmuyuknü ramde rük thsükhi, amütsü rhimorü lümkhi thsükhi chingnü I jikshang,

³ sherünü nukshang nangde arü mulo zücho, tüsho hühzobo nangde arü akhüh yubo amucho,

⁴ amülim mülarü kheak thüram chingnü kipchoh, zukleangnü tüsho mütrede api kheak kipchoh.

⁵ Arünü amütsü lümkhi kheak düngde tholochoh; arünü ramde qimürip zopü thade lümchoh, “Shenü isa ngüpü kukla?

⁶ Isanü amütsü rhimokhi shenü ayimkhitkhukpü? Isanü rük thsüde lümkhi thsükhitdo.” Tümüde mihtsürü lüm tüsho mulong alunglim ju süklah.

⁷ Tüshe Thrünpuhnü api hühzo arü kheak kipbah; arübo zukleangnü ayuribah.

⁸ Arü mulo dünkheaknü apinü arü kheak athsümünim handarübah; arü ngürü alalanü arü kubo angambah.

⁹ Mihtsürü alalanü atrebah, tüsho Thrünpuh rhimo khipkhitbah; tümüde arünü api rhimo lümlung lade lümakheahbah.

¹⁰ Thiyuro-lungkirünü Atungpuh lung asühbah, tüsho api kheak kinbah. Tüsho mulong alungki larü alala müretahbah.