MUNGSHIKHÜN 59 - AMÜSÜH HÜM CL Bible (BSI)

Akhümkhit Tamkhüntamnü

¹ I riribo kheaknü I bekhitang, O I Thrünpuh, I azhihde awusurü kheaknü I kümdoang,

² amütsü rhimorü kheaknü I bekhitang, tüsho thiyih bukpü mihtsürü kheaknü I khümkhitang.

³ Kheahang, arünü I rhangdung jimde aleanglah; bukmüke mihtsürü I azhihde mukhunga lah. Inü athsümünimkhi yungsho I neak dünkheaknü yung, O Atungpuh .

⁴ Inü amülim thsükhinü yungde, arünü alihde yüchoh tüsho thsakhamchoh. I rungpü asürang, tüsho kheahang!

⁵ Wuto Atungpuh Thrünpuh, nü Israel Thrünpuh ah. Trükshih alala thsümüchipü nü asürang; mülapmüjide amütsü lümkhi thsürü ki mihmüthsüm dühuh.

⁶ Tsüngre aban arünü alode arüchoh, khihnubo nangde chichoh tüsho kiuto mükamde münganchoh.

⁷ Atsütsü, arü mün chingnü amapkhitchoh; arü münküp ching nukshangbo lah; tümüde arünü thachoh, “Shenü sola?”

⁸ Tüshe O Atungpuh , nünü arü ki münejihchoh; nünü trükshih alala luhmünechoh.

⁹ Nü sühmüh kheak I mulonglamlah, nü I tsoyukpung, O Atungpuh .

¹⁰ I Thrünpuhnü api muzhodakkhi ching I shorubah; I Thrünpuhnü I riri kheak akuk ngükhi kheahshihbah.

¹¹ Arübo dülaksah, jude yungsho I mihtsürünü amihbah; nü wunü arü müzütshang, tüsho arü bekhiang, O Atungpuh isa tsung.

¹² Arü münküp tüsho arü yubo neak lah; arü kükheangkhi ching arü phuhshang, tümütüsho arünü athruchoh tüsho akeangyu thachoh,

¹³ nü bukakhiukkhi ching arü muyuang; shahde arü muyuang, junangde Israel ching Thrünpuhnü yakzan shuhchoh, tüsho api yakzan alomi alala khiungde lah de mihbüm abannü amükheahbah.

¹⁴ Tsüngre aban arünü alode arüchoh, khihnubo nangde chichoh tüsho kiuto mükamde münganchoh.

¹⁵ Arünü jim yimde rümde yüchoh, tüsho arü buk müthsüsho arünü arungchoh.

¹⁶ Tüshe inü nü sühmüh dünkheak khün thsübah; nü muzhodakkhi dünkheak inü yapsu achangnü khün thsübah. Tümüde nü I thsungkheak chipi tüsho I lümthsünü nimung ching I tsoyukpung ah.

¹⁷ O I sühmüh, inü nü ki mungshikhünbo thsübah, tümüde O Thrünpuh, nü I chipi, I amüthsüm Thrünpuh ah.