MUNGSHIKHÜN 58 - AMÜSÜH HÜM CL Bible (BSI)

Mihbukmuyuk Thsümüchipü Tamkhüntamnü

¹ Yakzanshuhrübo, nüsanü thiyuro-lungki asukcho shi? Nüsanü lungkide mihtsürübo mahkhapcho shi?

² Yung, nüsa mulong ching mihbukmuyuk rhimochoh; alomi ching nüsa khahnü thiyih bukpü akhualochoh.

³ Mihbukmuyuknü nuyam chingnü tsophülapchoh, arünü arü zübekhi chingnü akeangyu thade amülim thsüchoh.

⁴ Arü müzüm ju phuruto müzüm nangde lah; arü ju nükhünpeangkhi jingto nangde nükhün yihdochoh,

⁵ junangde amünitrü yungsho rük lade amünitrü düsheak manijih.

⁶ O Thrünpuh, arü mün ching hübo yihshakjang; kekhüzü nunu hülangpübo thokhitjang, O Atungpuh !

⁷ Arübo ke bukde atsokhi nangde dükheakshang; arübo rim nangde jungnakshang tüsho yiuhabahshang.

⁸ Arübo chinahololobe leamde atsahkhi nangde, küyimkishe ani müngüpü thsüde shea zübekhi khungarü nangde kamshang.

⁹ Arünü mümükheahyide rimbo nangde rhipa bahbah; Thrünpuhnü api bukakhiukkhi ching arü rhangdung lachoki yünde atsobah.

¹⁰ Thiyuro-lungkirünü royimkhi ngüchoki asühachihbah; apinü mihbukmuyuk thiyih ching ajing müsühbah.

¹¹ Mihtsürübonü athabah, “Tsükjide thiyuro-lungkirü thsungkheak thsambah khülang lah; tsükjide alomi ching mahkhaprü Thrünpuh khülang lah.”