MUNGSHIKHÜN 55 - AMÜSÜH HÜM CL Bible (BSI)

Müyamrünü Thsungyukjihrü Tamkhüntamnü

¹ O Thrünpuh, I tamkhüntamnü anijang, tüsho inü amushukhi chingnü nü düjik.

² I ki anijang tüsho alojang; inü atsanglokhinü I khia lah.

³ I ririnü alankhi dünkheaknü, mihbukmuyuknü junokhinü; tümüde arünü I kheak küpkhuk hande akih, tüsho bukakhiukkhi ching arünü I thraneanchoh.

⁴ I mulong ching thsünükhi lah, mihtrebe ashepü I kheak akihdo.

⁵ Atrebe tüsho ajanpü I kheak arüchoh, tüsho mihtrebenü I zhihodo.

⁶ Tüsho inü tha, “Müthrithrümpü nangde I ghidükeangbo kihkhülaa! inü phinde atsobah tüsho sühakhimbah;

⁷ atsütsü, limshude rümde ayübah, inü sunglo ching labah,

⁸ tsüngpungtsüngpung tüsho chinthrüm chingnü atsokhipü inü aniokheambah.”

⁹ O Atungpuh , thsümünimang tüsho arü yutha chamnakjang, tümüde inü kiuto ching athsümünim tüsho neamneamruru ngüdo.

¹⁰ Animung tüsho are arünü chipibo mükamde yüchoh; amülimkhi tüsho küpkhuk ju bolung lah.

¹¹ Athsümünimbe ju bolung lah; mülapmüji tüsho amülim kiudunglimrobo chingnü müchamachih.

¹² I keangrümünerü ju I riri thsükhülaa, inü arüma labah; I kurungkheak kükheangrü ju I azhihrü thsükhülaa, api kheaknü inü jika labah.

¹³ Tüshe nü, I thülünrü, rukhüh rhimorü tüsho I müyamrü khung ah.

¹⁴ Isa rukhüh asukachihde lado tüsho rukhüh arüngyam ching kingaündo.

¹⁵ Ashepünü arü tholoshang; arübo arhangnü Ashe-lomi ching yüshang, tümüde mihbukmuyuk arü lapungbo tüsho arü bolung ching lah.

¹⁶ I thsungkheak a, inü Thrünpuh ki jibah, tüsho Atungpuhnü I khümkhitbah.

¹⁷ Arelim, yapsulim tüsho animuro inü tamkhüntamnübah, tüsho achangnü azhibah, tüsho apinü I düsheak sobah.

¹⁸ I azhihde keochihkhi chingnü apinü I me mungtsü chingnü rhokhit, tümüde I azhihde ahihdo lakheah.

¹⁹ Thrünpuhnü asobah, tüsho arü thsümüchibah, api adüsonü lah. Tümütüsho arünü mümüthri, jumonü arünü Thrünpuh mütre.

²⁰ Api ki mungtsü larü azhihde api khah chungkih; apinü nihbuh tangzüng thsümünim.

²¹ Api mün ching thiyubo ju shihkingkung kheaknü athünakbe, tüshe api mulong ching thirithsü lakheah; api yubo ju müdangke kheaknü athünakbe tütüshe jurübo ayuk nukshangbo lakheah.

²² Atungpuh kheak nü hahmülang zojang, tüsho apinü nü tsunglobah; apinü küyimkishe thiyuro-lungkirü matrütshih.

²³ Tüshe O Thrünpuh, nünü arübo athsümünim shingkung ching hande ayüzahbah; mihlaksahrü tüsho mülapmüji mihtsürü arü nimungbo chamkhüh she alapü yung; tüshe I a nü kheak kinbah.