MUNGSHIKHÜN 51 - AMÜSÜH HÜM CL Bible (BSI)

Neak Bahpü Tamkhüntamnü

¹ O Thrünpuh, nü muzho yande I kheak amüthsüm laang; nü amüthsüm hihdakkhi yande I amülimbo nankhita bahjang.

² Inü alakmihkhibo müsüh-a bahjang, tüsho I neak chingnü I müsühjang.

³ Tümüde inü alakmihkhibo inü mükheahlah, tüsho kamruhroro I neak I miki lah.

⁴ Nü azhihdü lang inü neak yihbeakdo, tüsho nü miki tümü amütsüanü rhimodo. Junangde nünü asukchoki nü alim ngübah; tüsho nünü mahkhapchoki amudopü müla.

⁵ Kheahang, amülimkhi ching zübedo, I neak ching I benü I mübünkeangde kam.

⁶ Kheahang, nünü alunglim thiyuro lunechoh, tüsho jika lakhi ching nünü I ki lümlung mükheahshihbah.

⁷ Monamnü I müsühjang, tüsho I müsühde akambah; I müsühjang, tüsho I phürüm kheaknü amüyebe labah.

⁸ I ki asühachih tüsho asühkhi soshang, junangde nünü ayihthünakkhi robo asühachihbah.

⁹ I neakbo chingnü nü miro jikang tüsho I amülimkhibo alala nankhita bahjang.

¹⁰ O Thrünpuh, I kheak mulong amüsüh khülang thrünjang, tüsho I kheak thiyuro me aso kamshang.

¹¹ Nü mikinü I yana dütsoshih, tüsho I kheaknü me amüsüh lude dütsojih.

¹² I kilim akhümkhit asühachihpü jihloang, tüsho nü ki mihyuanipü I künsahde kamshang.

¹³ Judüki inü athsümünimrü ki nü limrobo thsangyubah. Tüsho aneakrübo nü kilim rholobah.

¹⁴ O Thrünpuh, thiyih bukkhi mülimkhi chingnü I bekhitang, nü I akhümkhit Thrünpuh, tüsho inü asühde nü thiyuro-lungki zhiyukbah.

¹⁵ O Atungpuh , I münküp khimshuhjang, tüsho inü nü shibah.

¹⁶ Tümüde nünü laksah-a kingaünkhi mulune, jude yungkhülaa inü jih-a labah; nünü taka kingaünkhi ching masühchoh.

¹⁷ Thrünpuh kilim shuhmülanga jihpü ju azhihayih me lah; azhihayih tüsho arholokhi mulong, O Thrünpuh, nünü ju mübahyuk.

¹⁸ O Thrünpuh, Zion muzhoang tüsho rungang; Jirusalem chipibo thsülojang.

¹⁹ Judüki thiyuro-lungki laksah-a kingaünkhi, nü asühshihpü abümnü taka kingaünkhi labah; tüsho moshipungbo nü kingaün sadambo kheak jihbah.