MUNGSHIKHÜN 46 - AMÜSÜH HÜM CL Bible (BSI)

Thrünpuh Isa Lung Lah

¹ Thrünpuh ju isa tsoyukpung tüsho sühmüh, küpkhuk kim ching rungpü thsüde lah.

² Jumonü alomi lahkhitkhit she, tüsho awungbo ju keto ching hande yüyü she isanü mütre;

³ kebo arungrung she tüsho abükbük she, tüsho awungbo ahukkhinü niukniuk she.

⁴ Thrünpuh kiuto, Khide Achangbuh amüsüh yam ching asühpü hande arükhi ayung khülang lah.

⁵ Ju kiuto ching Thrünpuh lah, tüsho ju küyimkishe müthsümünim; yapsu mükikde ju rungpü api arübah.

⁶ Trükshihbo müyinnimdo, kiulongthsübo niukdo; Thrünpuhnü tsüngmukchoh, tüsho alomi niuthünakchoh.

⁷ Wuto Atungpuh isa lung lah; Jakob Thrünpuh ju isa tsoyukpung.

⁸ Arang tüsho Atungpuhnü alomi kheak tümü amüyinsahbe rhimoa lanü kheahang.

⁹ Apinü alomiküp alala ching thirithsü tukloshihchoh; apinü sanglüh yihshakchoh, thsühbo thsümünimchoh tüsho monü tsungbo takchoh.

¹⁰ Zhikde laang, tüsho I Thrünpuh ah de mükheahang; trükshih bolung I shuhkihbah, alomi ching I shuhkihbah!

¹¹ Wuto Atungpuh isa lung lah; Jakob Thrünpuh ju isa tsoyukpung.