MUNGSHIKHÜN 44 - AMÜSÜH HÜM CL Bible (BSI)

¹ Isa nükhünnü sodo, O Thrünpuh; adüsonü arü nimungbo ching nünü tümü rhimokheanü isa jipürünü isa ki thado.

Kümdo thsungkheak Tamkhüntamnü

² Nü khahnü trükshihbo yankhit tüsho isa jipürübo lashih; nünü mihtsürübo zünak tüsho isa jipürübo zuzu kamshih.

³ Arü nukshangnü lomi kukkhi yung, yungsho arü binnü akuk angükhi yung; ha nü khah tsülim, nü bin tüsho nü miro ayin, tümüde nünü arü muzho.

⁴ Nü I kiulongthsüpuh tüsho I Thrünpuh; nünü nü mihtsürübo kilim akuk ngüshih,

⁵ tüsho nü wu hode isanü isa riribo kuk.

⁶ Tümüde I sanglüh kheak inü mükin, yungsho I nukshangnü I mükhümkhit.

⁷ Tüshe nünü isa riribo kheaknü isa khümkhit, tüsho isa thraneanrü achih ngüshih.

⁸ Isanü Thrünpuh lung nimung amuyung kükheangchoh, tüsho lünnü nü mung shichoh.

⁹ Tüshe nünü isa bahyuk tüsho achih ngüshih; nünü isa bonungrübo lung müyü.

¹⁰ Nünü isa thiriri müngüh tsoshih, tüsho isa azhihrünü isa yankhia lu.

¹¹ Nünü isa alaksahpü lakhi namfimihnunu nangde kamshih, tüsho trükshihbo lung isa hiumüzütshih.

¹² Nünü nü mihtsürü adün thülihde yin, arü dünkheak amo chakde mükheang.

¹³ Nünü isa yamhingrü ki isa achihbe, isa mühirü ki müthülünkhi tüsho münedung kamshih.

¹⁴ Nünü isa trükshihbo lung münedung kamshih; mihtsürübonü isa ki arü ku angamchoh.

¹⁵ Nimung amuyung makhamaleak I miki lah, tüsho achihkhinü I miro lüpdolah,

¹⁶ I riribo tüsho I thraneanrünü I luhmünekhi tüsho mükhemükimkhi hode ah.

¹⁷ Isanü nü mümihmih she yungsho nü tangzüng ching amülim mülalashe ha alala isa kheak dünji.

¹⁸ Isa mulong murholo; isa jing nü limro chingnü makhin.

¹⁹ Tüshe nünü isa zünak tüsho shirungbo lapung kamshih tüsho amiting akheahnü isa muhiudo.

²⁰ Isanü Thrünpuh mung mihsho, yungsho khiungkerü thrünpuh kilim isa khah chungkihsho,

²¹ Thrünpuhnü ju müyimkhitba de? Tümüde apinü mulong ching rama lakhi mükheahlah.

²² Tütüshe nü dünkheaknü isa nimung amuyung laksahdo; isa alaksahpü namfimihnunu nangde lado.

²³ Asürang, O Atungpuh ! Tümüde nü yapla? Nü asürang! Isa lünnü dübahyuk.

²⁴ Tümüde nü miro ramcho, tüsho isa thsünü le junokhi mihcho?

²⁵ Tümüde isa me asungthulung ching mükhümrama lah; isa pang alo kheak lüpkihchoh.

²⁶ Isa rungpü asürang, tüsho nü amüthsüm hode isa rhokhitang.