MUNGSHIKHÜN 42 - AMÜSÜH HÜM CL Bible (BSI)

HÜM MAHNE (M. Khün 42–72) Ramtso ching Mihtsürünü Tamkhüntamnükhi

¹ Shihmüchinü yungzü ke phurukhi nangde, I menü nü mürheangchoh, O Thrünpuh.

² I menü rhangdung Thrünpuh thsungkheak kethürichoh. Küyimki I Thrünpuh miki yüba?

³ I chikebo ju animung tüsho are I jim lakheah, I riribonü mutukzhakde I ki tha, “Nü Thrünpuh kükheak la?”

⁴ Küyimki inü harü lümkhitbanü, I me thurukhitchoh. Tümüde inü asühkhi düsheak thsüde, tüsho makshe jihde boto lung Thrünpuh yam lim yü.

⁵ Tümüde I khide mulong tukthsüla? Tümüde I khide küpkhukla? Inü Thrünpuh kheak I mulonglambah, tüsho mutuklode I khümkhitbuh tüsho I Thrünpuh shibah.

⁶ O I Thrünpuh, I me thsümünima lah, jumonü inü Jordan lomi Hermon mujuk, tüsho Mizar wung chingnü nü lümkhitbah.

⁷ Nü kezho düsheak ching asüknü asük ki jichoh; nü ke abükde abukkhinü I zhihodo.

⁸ Atungpuhnü animuro kim ching api muzhodakkhi huhbah, tüsho are api khün I lung labah– I rhangdung Thrünpuh kilim tamkhüntamnü khülang labah.

⁹ I tsungdojihrü, I Thrünpuh ki inü athabah, “Tümüde nünü I mih-a la? Tümüde I ririnü junokhinü I tüzhode ayüba?”

¹⁰ Arünü mükhemükimkhinü I züthünaka lah, arünü I ki nimung amuyung keochoh, “Nü Thrünpuh kükheak la?”

¹¹ Tümüde I khide mulong tukthsüla? Tümüde I khide küpkhukla? Inü Thrünpuh kheak I mulonglambah, tüsho mutuklode I khümkhitbuh tüsho I Thrünpuh shibah.