MUNGSHIKHÜN 41 - AMÜSÜH HÜM CL Bible (BSI)

¹ Shepünü zhochihrü lümrhihde lachonü asühpü; Atungpuhnü küpkhuk kim ching api rungbah.

Tukthsürü thsungkheak Tamkhüntamnü

² Atungpuhnü api kümbah tüsho rhangdung lashihbah, tüsho api alomi kheak müngühmühi labah; apinü anihbuh ariribo lümkhi ching muyukjih.

³ Atungpuhnü tukthsü yapkiu kheak api sühmüh düküngshihbah; tüsho anihbuh tukthsü yapkiu chingnü phü tsüloshihbah.

⁴ Inü tha, “O Atungpuh , I müthsümang; I thsüngujang, tümüde nü azhihde inü neak yihbeakdo.”

⁵ I riribonü I yuripü lümde thachoh, “Api küyimki sheba, tüsho amung dükheakba?”

⁶ Tüsho küyimki apinü I kheahpü arübanü, apinü akeangkeang yubo asukchoh; api mulongnü amülimbo hanmukhungchoh; küyimki api wukhiukbanü ju thachoh.

⁷ I thraneanrü alala rukhühnü I azhihde jikjikrarachoh; I azhihde I yuripü arünü rük asahchoh.

⁸ Arünü thachoh, “Api ashepü thsüde tukthsülah; api kheakü yaplah, api küyimkishe masürülo.”

⁹ Inü mulonglamkhi I müyamrükhung, I yikhap tsührünü she I azhihde api lahzhi shuhkihdo.

¹⁰ Tüshe, O Atungpuh , I müthsümang tüsho I lahmusuang, junangde inü arü ki athrihlobah.

¹¹ Arünü I kurungkheak akuk müngü, tüsho nünü I kheak asühlah de inü amükheahbah.

¹² Nünü I rungbah, tümütüsho inü alungki rhimochoh; nünü I nü miki lünnü alashihbah.

¹³ Israel Thrünpuh Atungpuh shiang! kheakü tüsho lünnü api shiang! Amen! Amen!