MUNGSHIKHÜN 38 - AMÜSÜH HÜM CL Bible (BSI)

¹ O Atungpuh , nü bukakhiukkhi ching I düthürüh, yungsho nü masühkhi ching I düthsümüchi!

Thsünü Mihtsürü Tamkhüntamnü

² Tümüde nü hühzobonü I sükde chinkhitdo, tüsho nü khahnü I nimmülündo.

³ Nü bukakhiukkhinü I shihphü mütsü, yungsho I neak hode I robo tsüde müla.

⁴ Tümüde I mülimkhibo I ku alapde yükihdo; hahmülang nangde ahanpü khide mülanglah.

⁵ I makhakhinü I mü arhüm münimlah tüsho shuh-a lah.

⁶ I küpkhukdo, I khide abobe kamdo; inü nimung amuyung tüzhochoh.

⁷ I düthsün phülam takde thsülah; I shihphü atsü müla.

⁸ I sühmüh müla tüsho keamthünaka lah; I mulong thsünükhinü ashechoh.

⁹ Atungpuh , I künkhi alala nü miki lah; I sheak dükipkhi nü kheaknü müram.

¹⁰ I mulong thüpthüpchoh, I sühmüh müla; I mük chingnü ayin she wukhiukdo.

¹¹ I mübo lakhinü inü amuzhorü tüsho I müyamrübonü I bahkhido; I keoniorübo I kheaknü limshude lah.

¹² I rhangdung yimrünü I thsungkheak qimürip thsüchoh; I yuripü yimrünü athsümünim asukchoh, tüsho nimung amuyung mülapmüji lümkhi thsüchoh.

¹³ Tüshe I a, nükhünpeangrü mihtsürü nangde muso; I a mün mükhimshuhkhi aduhrü nangde lah.

¹⁴ Hanangde I a musokhi mihtsürü, malojihkhi mün nangde lah.

¹⁵ Tüshe O Atungpuh , inü nü kheak kinchoh; O Atungpuh I Thrünpuh, nünü alojihbah.

¹⁶ Tümüde inü tha, “I ki sojang, jude yungsho arünü I kurungkheak asühachihbah. Jude yungsho I jing lihbah I azhihde arü I kurungkheak shuhkihbah.”

¹⁷ Tümüde I alungpü thsüde lah, tüsho I mulong rozhak mutuklode I miki lah.

¹⁸ Tümüde inü I mülimkhi thakhitbah; inü I neak dünkheak thsünübah.

¹⁹ I riribo shihphü tsüde sühmüh lah; amütsan mülade I thraneanrü hihlah.

²⁰ Atsü dün amütsü jihlorünü I azhihchoh, tümütüsho inü alungki rhimopü mürangchoh.

²¹ O Atungpuh , I dübahyuk, O I Thrünpuh, I kheaknü limshude düla.

²² I rungpü niokheamang, O Atungpuh , I khümkhitrü!