MUNGSHIKHÜN 37 - AMÜSÜH HÜM CL Bible (BSI)

¹ Mihbukmuyuk dünkheaknü mulong düsansan; amülim rhimorü kheak mük düthsü.

Mihbukmuyukrü tüsho Atsürü Kuhi

² Rim mukuhabahkhi nangde arübo nahde kheamabahbah; sangrungbo yiuhkhi nangde arübo ashebah.

³ Atungpuh kheak kinang, tüsho atsü rhimoang; lomi ching khümkhita laang.

⁴ Atungpuh lung asühang, tüsho nü mulongnü akünkhi apinü nü kilim jihbah.

⁵ Atungpuh kilim nü limro jihang; api kheak kinang, tüsho apinü arhimobah.

⁶ Apinü nü alim mütsankhi ayin nangde, tüsho nü alim animuro nangde hande arübah.

⁷ Atungpuh miki zhikde laang tüsho arümkheamde api aleangang; mihtsürübonü arü mihbukmuyuk lümkhi asahde arü limrobo ching akuk ngüchoki mulong düsansan.

⁸ Mulong düsansan yungsho bukdakhiuk, junü küpkhuk lim lang bechoh.

⁹ Tümüde amütsü rhimorü yankhita bahbah, tüshe sherünü Atungpuh aleangchonü alomi yamrüplurüp lubah.

¹⁰ Mihbukmuyukrü nahde adükheakbah; nünü arü kheahbah tüshe müngü;

¹¹ azhihayihrünü lomi lubah tüsho latsühlayung le mungtsü ching asühachihbah.

¹² Mihbukmuyuknü thiyuro-lungkirü azhihde lümkhi asahchoh, tüsho api kheak hü züchoh.

¹³ Atungpuh nü api ki münejihchoh, tümüde anihbuh nimung arükhi apinü ngüchoh.

¹⁴ Mihbukmuyuknü zhochihrü le mülamüthsürü tüsho alungki rhimorü laksahpü nukshangbo dukkhit tüsho sanglühbo hünkihdo.

¹⁵ Arü nukshangbo arü mulong ching yüzahbah, tüsho arü sanglühbo zhakbah.

¹⁶ Mihbukmuyuk lakhit ahihdo kheaknü a thiyuro-lungkirü lakhit anikhüh atsübe ah;

¹⁷ tümüde mihbukmuyuk binbo zhakbah, tüshe Atungpuhnü thiyuro-lungkirü tholochoh.

¹⁸ Atungpuhnü alungkirü nimungbo mükheahlah, tüsho arü yamrüplurüp lünnü alabah.

¹⁹ Amütsü kim ching arü achih müngü, tüsho khümzung nimungbo ching arü suhdahde alabah.

²⁰ Tüshe mihbukmuyuk adükheakbah; tüsho Atungpuh riribo mütüm sangbün jaktsü nangde akheambah.

²¹ Mihbukmuyuknü shonip luchoh, tüsho müshaklochoh, tüshe thiyuro-lungkirü a salade lah tüsho jihchoh;

²² Atungpuhnü müngühjihrünü lomi yamrüplurüp lubah, tüshe apinü muthrumüneanrü a yankhita bahbah.

²³ Mihtsürü atsü jingdükübo Atungpuh kilimnü lah, tüsho apinü anihbuh limro ching asühchoh.

²⁴ Api lunga lalashe phapde müyap; tümüde Atungpuh khahnü api tholochoh.

²⁵ I athunu lakheah, tüsho kheaküa shindo; tütüshe thiyuro-lungkirü bahyukkhi yungsho api tsühsoniusonü yikhap kakheangde inü müngü.

²⁶ Api lünnü amüthsüm lah, tüsho püpürü ki nipjihde lachoh; tüsho api tsühsoniusobo müngühmühia lah.

²⁷ Amütsü chingnü chamkhiang, tüsho atsü rhimoang; tüsho lünnü laang.

²⁸ Tümüde Atungpuhnü thiyuro muzhochoh, tüsho api yo amüsührübo mübahyuk; arübo lünnü küma lah, tüshe mihbukmuyuk tsühsoniusobo yankhita bahbah.

²⁹ Thiyuro-lungkirünü lomi yamrüplurüp lubah, tüsho ju ching lünnü alabah.

³⁰ Thiyuro-lungkirü münnü lümlung asukchoh, tüsho api mulonü thiyuro thachoh.

³¹ Anihbuh Thrünpuh yakzan api mulong ching lah; api jingdükübo mülih.

³² Mihbukmuyuknü thiyuro-lungkirü laksahpü jimde yimchoh.

³³ Atungpuhnü api anihbuh khah ching mübahjih, yungsho api mahkhapchoki mübahyuk.

³⁴ Atungpuh aleangang, tüsho api limrobo zoang, tüsho alomi lushihpü apinü nü shuhkihbah; nünü mihbukmuyuk thsümünimkhi kheahbah.

³⁵ Inü mihbukmuyuk ju wu ching tode, Lebanon cedar sang nangde changde ngü.

³⁶ Tütüshe api tsoabah, tüsho kheaküa müla; inü api yim, tüshe müyimkhit.

³⁷ Areak mükihkhi mihtsürü mütsanang, tüsho alungkirü kheahyukang; tümüde ju mihtsürü arübe kuhi mungtsü lah.

³⁸ Tüshe athsümünimrübo rukhühnü adükheakbah; mihbukmuyuk arübe kuhi ju adükheakbah.

³⁹ Tüshe thiyuro-lungkirü akhümkhit ju Atungpuh kilimnü lah; api ju küpkhuk kim ching arü sühmüh lah.

⁴⁰ Atungpuhnü arü rungbah tüsho bekhitbah; apinü arübo mihbukmuyuk kheaknü bekhitbah tüsho khümkhitbah, tümütüsho arünü api kheak kin.