MUNGSHIKHÜN 36 - AMÜSÜH HÜM CL Bible (BSI)

¹ Neak yihbeakkhinü mihbukmuyuk ki api mulong ching sükde asukchoh; api mük ki Thrünpuh trekhi müla.

Mihtsürü Mihbukmuyukkhi

² Tümüde apinü anihbuh neak müyimkhit yungsho müthranean de nihbuh küdah thsüde changde lümchoh.

³ Api yu asukkhibo mihbukmuyuk ah tüsho akeangyunü milah; apinü kheaküa lümlung lade arhimopü tüsho atsü rhimopü kheamabahdo.

⁴ Api yapkiu ching yapde alachoki amütsü lümkhi asahchoh; tüsho apinü arhimokhi tümü she atsü müla, tüsho apinü küyimkishe amütsü mübahyuk.

Thrünpuh Tsükhi

⁵ O Atungpuh , nü muzhodakkhi yinmibo, nü thiyuro-lakhinü thüningbo khiunglah.

⁶ Nü thiyuro-lungki ju awung ato nangde lah; nü thiyuro ju keto asük nangde lah. Mihtsürü tüsho shiwühbo nünü akünkhi ching lah.

⁷ O Thrünpuh, nü muzhodakkhi küdükhüh shoto a! Mihtsürü tsührübonü nü ghidükeangbo me khüp tsoyukchoh.

⁸ Arünü muzhomopungde nü yam ching aniojibah; nünü nü asühkhi ayung chingnü arü kilim ayungpü jihchoh.

⁹ Tümüde nü kheak rhangdung ke bukpung lah; nü ayinatrüm ching isanü ayin ngüchoh.

¹⁰ Nü mükheahrü kilim nü muzho, mulong alungkirü kilim nü thiyuro-lungki mutuklode laang.

¹¹ Akükheangrü jing I azhihde darüshih, yungsho mihbukmuyuk khahnü I yana dütsoshih.

¹² Amütsü mihtsürü lunga yapkhi kheahang; arübo masürükhukde yaplah.