MUNGSHIKHÜN 35 - AMÜSÜH HÜM CL Bible (BSI)

¹ O Atungpuh , I azhihrü kheak azhihang; I bede keochihrü kheak keochihang.

Arung thsungkheak Tamkhüntamnü

² Tsung tüsho thirithsü zülu luang tüsho I rungpü asürang.

³ I müshamrü azhihde nü thsüh tüsho thsühshangpü shuhkihang. I me ki thaang, “I nü akhümkhit.”

⁴ Sherünü I rhangdung yimchonü, achih ngüshang tüsho mükhemükimshang; sherünü I azhihde rük asahchonü rholoshang tüsho yingyingde kamshang.

⁵ Arübo apung müngüh müneang nangde, Atungpuh yunirünü arü yana tsoshang;

⁶ Atungpuh yunirünü arü müshamde, arü limro mitingshang tüsho shahshahshang.

⁷ Amütsan mülade arünü I thsungkheak azheang zo, tüsho I phuhpü müthrim asük kiu.

⁸ Tüshe arünü mümükheahyide athsümünimnü arü tholobah; arü nihbuh zheang ching phuhbah tüsho athsümünim ching keamyukbah.

⁹ Judüki I menü Atungpuh lung asühachihbah, tüsho api akhümkhit ching asühbah.

¹⁰ I mulong athrünkhinü athabah, “O Atungpuh , nü nangde she la? Nünü sühmüh larü kheaknü ayiuhyiuhrü, tüsho junorü kheaknü zhochihrü bekhitchoh.”

¹¹ Mihmukhiuh thiyumütsanbo I azhihde arüchoh; inü mümükheahkhi arünü I ki keokhichoh.

¹² Arünü I kilim atsü dün amütsü jihlochoh; I me tüzhokhi ching lah.

¹³ Tüshe küyimki arü tukthsüde alakhea, inü shungliukhim phuyubah azhihayihde khümkeak thsü. I tamkhüntamnü I ki malojihyikia,

¹⁴ I müyamrü yungsho I keoniorü thsungkheak nangde tüzho. I be thsungkheak tripkhi nangde mulong rozhakde I ku khuram.

¹⁵ Tüshe I jingmükhea lachoki arünü asühachihde rukhüh mukhung, ayanrünü I mülümrhangchoki I azhihde mukhung. Arünü mutukzhakde I chikhichihean thsü.

¹⁶ Amükinrü nangde arünü chikhide I luhmünechoh; arünü I kheak arü hü mütrütchoh.

¹⁷ O Atungpuh , külokhüh nünü akheahba? Arünü ayankhi chingnü I khümkhitang; kekhüzübo chingnü I rhangdung khümkhitang.

¹⁸ Inü mukhungmüdan ato ching nü ki makshe jihbah; mihtsürü ahihdo lung inü nü shibah.

¹⁹ Akeangyu tharü I riribonü I kurungkheak dasühachihshih; yungsho amütsan mülade I thraneanrünü mük dathrapshih.

²⁰ Tümüde arünü mungtsü masuk, tüshe arünü lomi ching keamramde alarü azhihde mülapmüji asahchoh.

²¹ Arünü I azhihde mün mülihde khimshuhchoh; arünü thachoh, “Aha, Aha! isa müknü ha ngüdo!”

²² O Atungpuh , nünü ha ngüdo; zhikde düla. O Atungpuh , I kheaknü limshude düla.

²³ Kurhangang, tüsho I tsungdopü asürang! I thsungkheak mürangjang I Thrünpuh tüsho Atungpuh .

²⁴ Nü thiyuro-lungki ching I alim mütsanjang, O Atungpuh I Thrünpuh; tüsho arünü I kurungkheak dasühachihshih.

²⁵ Arünü nihbuh küdah thsüde düthashih, “Aha, isa mulongnü akünkhi lah!” Arünü düthashih, “Isanü api muyudo.”

²⁶ I thsümütsü kheak asühachihrü rukhühnü achih ngüshang tüsho yingyingshang; I kurungkheak arü küdah thsüde ashuhkihrü achih ngükhi tüsho wüntre mülakhinü lüpdoshang.

²⁷ I thiyuro-lungki lümjihrünü asühachihde zhishang; tüsho mutuklode arünü thashang, “Api yamlarü tsüde alakhi ching asühkhi Atungpuh shuhkihshang.”

²⁸ Judüki inü nü thiyuro-lungki zhiyukbah, tüsho nimung amuyung nü shijihbah.