MUNGSHIKHÜN 34 - AMÜSÜH HÜM CL Bible (BSI)

¹ Kim alala ching inü Atungpuh ki makshe jihbah, api shikhi mutuklode I mün ching labah.

Thrünpuh Tsükhi Shijihkhi

² I menü Atungpuh lung kükheangbah; junoa larünü ha sobah tüsho asühbah.

³ I lung Atungpuh müretahshang, tüsho isa rukhühnü api mung shuhkihanü.

⁴ Inü Atungpuh yim, tüsho apinü I ki alojih, tüsho I trekhi alala chingnü I bekhit.

⁵ Junoa larübonü api kheah tüsho zhingzhingde kam, tüsho arü miro achih müngü.

⁶ Zhochihrü mihtsürünü zhi, tüsho Atungpuhnü alojih, tüsho api küpkhukbo alala chingnü khümkhit.

⁷ Atungpuh wüntrerü api yunirünü aheangchoh tüsho arü bekhitchoh.

⁸ Atungpuh tsükhi rükakheahang tüsho kheahang; mihtsürü shepü api kheak tsoyukchonü asühpü.

⁹ Nüsa api yo amüsührübo, Atungpuh treang, tümüde api ki trerü a tümü she muzholüm.

¹⁰ Kekhüzübo yiuhyiuhde akampü tüsho akhümpü kuklah, tüshe sherünü Atungpuh yimchonü atsü tümü she muzholüm.

¹¹ Arang, I tsührübo, I ki aniang, inü nüsa ki Atungpuh wüntrepü thsangyubah.

¹² Mihtsürü shepünü rhangdung muzhola tüsho atsü nimungbo ngüpü mulongcho?

¹³ Amütsü asukpü tüsho akeangyu thapü chingnü nü mulo tüsho nü mün tukloang.

¹⁴ Amütsü chingnü chamkhiang tüsho atsü rhimoang; mungtsü yimang, tüsho ju müshamang.

¹⁵ Atungpuh mük ju thiyuro-lungkirü lim, tüsho api nükhün arü zhikhi thrip lah.

¹⁶ Atungpuh miro ju alomi ching arü mülümkhitde akampü amütsü rhimorü azhihde lah.

¹⁷ Küyimki thiyuro-lungkirünü arung thsungkheak zhibanü Atungpuhnü alochoh, tüsho arü küpkhuk alala chingnü bekhitchoh.

¹⁸ Atungpuh ju mulong tukthsürü thüninde lah, tüsho me thsümünima larü khümkhitchoh.

¹⁹ Thiyuro-lungkirü küpkhuk hihde lah, tüshe Atungpuhnü jurü alala chingnü api bekhitchoh.

²⁰ Atungpuhnü api robo alala kümchoh; jurü khülang she müyihshak.

²¹ Amütsü-rhimonü mihbukmuyuk laksahbah; tüsho thiyuro-lungkirü thraneanrü bahyukbah.

²² Atungpuhnü api yamlarübo rhangdung rhokhitchoh; api kheak tsoyukrü sheshe mübahyuk.