MUNGSHIKHÜN 32 - AMÜSÜH HÜM CL Bible (BSI)

¹ Shepü alakmihkhi neak bahjihcho, shepü neak lüpdojihchonü müngühmühi.

Neak Alokhikhi tüsho Bahjihkhi

² Mihtsürü shepü neak Atungpuhnü api azhihde mükhecho, tüsho shepü me ching mülapmüji mülanü müngühmühi.

³ Küyimki inü I neak müthakhitkheanü, nimung amuyung ashearakhinü I robo keahkhia lakheah.

⁴ Tümüde animung tüsho are nü khah I kheak mülangde alakheah; muzhu ching lamlamkhinü nangde I sühmüh kungabah.

⁵ Judüki inü nü ki I neak kheang; inü amülim rhimokhibo müram. Inü jurü nü ki thakhitpü pungkhi, tüsho nünü I neak alala bahjih.

⁶ Jumonü thiyuro mihtsürübonü arü lümthsünü kim ching nü ki tamkhüntamnüshang; tsükjide keto kingde akihchoki junü arü mukhiung.

⁷ Nü a I jikpung ah; nünü I küpkhuk chingnü kümdobah tüsho abekhitkhi khünbonü I mükamdobah.

⁸ Nü yüpü limro inü nü ki thsangdanbah tüsho thsangyubah; I müknü inü nü kheahbah.

⁹ Mihyuanishihpü münmükhip tüsho shihküp-liunü adanyukkhi anikhitkhi mülakhi khora yungsho khoranunu nangde düla.

¹⁰ Mihbukmuyuk kilim mulong rozhak ahihdo labah; tüshe shepü Atungpuh kheak kinchonü mihmüthsümnü api mükamdobah.

¹¹ Nüsa thiyuro-lungkirü, Atungpuh lung asühang tüsho asühachihang; nüsa mulong ching alungki larü asühde zhiang!