MUNGSHIKHÜN 31 - AMÜSÜH HÜM CL Bible (BSI)

¹ O Atungpuh , I nü kheak tsoyukdo; I küyimkishe achih düngüshih; nü thiyuro-lungki ching I bekhitang.

Thrünpuh kheak Kinkhi Tamkhüntamnü

² I kilim nü nükhün anguhang, I khümkhitpü nahde arang; I tsoyukpü lungto, I khümkhitpü amüküp chipi thsang.

³ Nü a I lungto tüsho I chipi, nü mung chingnü I beang tüsho kümang.

⁴ I thsungkheak jika zokhi keang chingnü I bekhitang, tümüde nü I tsoyukpung ah.

⁵ Nü khah ching I me jihchoh; nünü I rhokhit, O Atungpuh , thiyuro Thrünpuh.

⁶ Arükchih thrünpuhbo kingaünrü nünü thraneanchoh; tüshe inü Atungpuh kheak kinchoh.

⁷ Nü muzhodakkhi thsungkheak inü asühachihbah tüsho asühbah, tümütüsho nünü I thsünü ngü, nünü I me thsünükhi mükheah,

⁸ tüsho I riri khah ching I muyukjih; nünü I jing amülih dangpung ching zojih.

⁹ I ki müthsümang, O Atungpuh , tümüde I lümthsünü ching lah; atüzhokhinü I mükbo le I me tüsho I pang khia lah.

¹⁰ Mulong rozhakkhinü I khia lah, tüsho atripkhinü I rhangdung khihabahdo. Inü alakmihkhi hode I khia lah, tüsho I robo keahkhia lah.

¹¹ I riribo alala tüsho I yamhingrübonü I bahyukde rhimochoh; I mükheahachihrünü I trechoh; küyimki arünü kiudunglimro ching I ngübanü alihde tsochoh.

¹² Asherü nangde arünü I mihabahdo; I a phüh trükhi khülang nangde kamdo.

¹³ Tümüde akeangyu thakhi ahihkhüh inü sochoh; thrip aban atrebe lah; arünü I azhihde rük thsüchoh tüsho I rhangdung lupü mülapmüjichoh.

¹⁴ Tüshe inü nü kheak kinchoh, O Atungpuh ; inü thachoh, “Nü I Thrünpuh.”

¹⁵ I kimbo nü khah ching lah; I riribo tüsho I thsümüchirü khah chingnü I bekhitang.

¹⁶ Nü yamlarü kheak nü miro yinshang; nü muzhodakkhi ching I khümkhitang.

¹⁷ I achih düngüshih, O Atungpuh , tümüde inü nü ki jichoh; mihbukmuyuk achih ngüshang, arübo malande Ashe-lomi ching yüzahshang.

¹⁸ Arünü kükheangde tüsho bahyukde thiyuro-lungkirü azhihde asukkhi dünkheak arü keangtha münküp zhikde kamshang.

¹⁹ Mihtsürü tsührübo miki nü trerü tüsho nü kheak kinrü thsungkheak nünü azojihkhi nü tsükhi küdükhüh ato a!

²⁰ Nünü arübo mihtsürübonü mülapyukpü chingnü nü miki jikpung ching jika zochoh; nünü arübo arü riribo mükhemükimrü chingnü kurampung ching jika zochoh.

²¹ Atungpuh shiang, tümütüsho I ayandokhi kiuto ching lachoki apinü amüyinsahbe amuzho I ki huh.

²² Tümüde inü trede tha, “I nü mük kinü lipkhia bahdo”; tütüshe inü nü ki mushude azhikhi düsheak nünü sojih.

²³ O nüsa api yo amüsührü alalanü Atungpuh muzhoang! Atungpuhnü thiyuro larü kümde zochoh, tüshe apinü akükheangrü mode thsümüchichoh.

²⁴ Nüsa Atungpuh kheak mulonglamrü alala, sühmüh düküngang, mulong toang.