MUNGSHIKHÜN 29 - AMÜSÜH HÜM CL Bible (BSI)

¹ Atungpuh shiang, O nüsa yinmirübo, Atungpuh müretahkhi tüsho wu shiang.

Chinthrüm ching Atungpuh Düsheak

² Atungpuh müretahkhi mung shiang; amüsüh akhamdakkhi ching Atungpuh kingaünang.

³ Atungpuh düsheak kebo kumung lah; müretahkhi Thrünpuhnü tsüngmukchoh; Atungpuh ju muliuke kumung lah.

⁴ Atungpuh düsheak ju wu lah; Atungpuh düsheak ju wüntre-müretahnü milah.

⁵ Atungpuh düsheaknü cedar yihshakchoh; Atungpuhnü Lebanon cedarbo yihthünakchoh.

⁶ Apinü Lebanon wungbo moshi nunu nangde, tüsho Hermon wung moshipung shihthrülü nangde jukshihchoh.

⁷ Atungpuh düsheaknü chinchobe phürapshihchoh.

⁸ Atungpuh düsheaknü sunglo niukchoh, Atungpuhnü Kadesh sunglo niukchoh.

⁹ Atungpuh düsheaknü thülamsangbo niukchoh, sangdungbo kheaknü sangyübo adankhichoh; tüsho api arüngyam ching alalanü zhichoh, “Müretahkhi!”

¹⁰ Atungpuh kiulongthsü-binkiu keking kumung kheak lah; apinü lünnü kiulongthsürü thsüde yakzan shuhchoh.

¹¹ Atungpuhnü api mihtsürü kilim sühmüh jihchoh; Atungpuhnü api mihtsürü mungtsü müngühmühi jihchoh.