MUNGSHIKHÜN 27 - AMÜSÜH HÜM CL Bible (BSI)

¹ Atungpuh ju I tsün tüsho I akhümkhit; inü she trepü la? Atungpuh ju I rhangdung sühmüh ah; inü she trepü la?

Mungshi Tamkhüntamnü

² Küyimki mihbukmuyukrü I azhihde I shih tsühpü arükheanü, I riribo jing mükhe tüsho lungabah.

³ Bonungrü boto khülangnü I zündodo she, I mulongnü mütre; I azhihde thirithsü wususu she, I mulongram labah.

⁴ Inü Atungpuh ki tümükhüh khülang kheang, ha inü ayimkhi lakheah: junangde inü Atungpuh akhamkhi kheahpü, tüsho arüngyam ching api yimpü I rhangdung amuyung Atungpuh yam ching labah.

⁵ Küpkhuk nimung api lapung ching I jikshihbah; apinü arüngkhimyam phudobe khüp I jikshihbah, apinü I lungto khülang kheak changde azojihbah.

⁶ Tüsho kheakü I zündoa lakhi I riribo kumung I ku shuhkihbah; asühde zhide inü api arüngyam ching shuhmülanga kingaünkhibo jihbah; inü khün thsübah, inü Atungpuh shibah.

⁷ O Atungpuh , inü changde azhichoki sojang, I ki müthsümang tüsho alojang!

⁸ Nünü tha, “Nünü I miro yimang.” I mulongnü nü ki thachoh, “Atungpuh , inü nü miro yimchoh.”

⁹ I kheaknü nü miro düjik, nü yamlarü bukakhiukde dütsoshih; nü I rungrü lakheah. I dübahjih yungsho dübahyuk O I akhümkhit Thrünpuh!

¹⁰ Tümüde I buh le I benü I bahyukdo, tüshe Atungpuhnü I küma lubah.

¹¹ I ki nü limro thsangyuang, O Atungpuh ; I riribo hihlale I limro amukhiung ching beang.

¹² I riribo lümkhi ching I düyukjih, tümüde athsümünim sheak thsükhitde I azhihde thiyumütsan wusudo.

¹³ Rhangdung lakhi lomi ching inü Atungpuh tsükhi ngübah de inü kinlah!

¹⁴ Atungpuh aleangang; reangzahang, tüsho nü mulong toang; inü thachoh, Atungpuh aleangang!