MUNGSHIKHÜN 26 - AMÜSÜH HÜM CL Bible (BSI)

¹ I mütsanmükhiang, O Atungpuh , tümüde inü thiyuro-lalim ching tsahdo, inü manguhphülapde Atungpuh kheak kindo.

Mihtsürü Atsü Tamkhüntamnü

² O Atungpuh , I mütsanmükhiang tüsho mahkhapang; I mulong tüsho I lümkhi rükakheahang.

³ Tümüde nü muzhodakkhi I miki lah, tüsho inü nü ki thiyuronü tsahchoh.

⁴ Inü amülim mihtsürübo lung mübinchoh, yungsho rük mütsürü lung müyüchoh;

⁵ inü amütsü rhimorü boto thraneanlah, tüsho mihbukmuyukrü lung inü mübin.

⁶ Inü amülim mülakhi ching I khah mütsakchoh, tüsho nü kingaün sadam mükamde yüchoh, O Atungpuh ,

⁷ makshe jihkhi khün thsüchoh tüsho nü amüyinsahbe rhimobo thachoh.

⁸ O Atungpuh , inü nü lapung yam, tüsho nü müretah lakhi dangpung muzholah.

⁹ Aneakrü yungsho mihkhukrü lungnü I phüta dübah,

¹⁰ mihtsürübo sherü khah ching amütsü asahkhi la, tüsho sherü khah tsülim buknimnü mila.

¹¹ Tüshe I a, I thiyuro-lalim ching tsahchoh; I rhokhitang, tüsho I ki müthsümang.

¹² Thsümütsü alala chingnü I khümkhita lah; amukhungrü bolung inü Atungpuh shijihbah.