MUNGSHIKHÜN 21 - AMÜSÜH HÜM CL Bible (BSI)

¹ Nü sühmüh ching kiulongthsüpuh asühchoh, O Atungpuh ; tüsho nünü akuk ngüshihkhi ching api küdükhüh tode asühba!

Akuk Ngükhi Mungshi

² Api mulongnü akünkhi nünü api kilim jih, tüsho apinü mushukhi nünü alojih.

³ Tümüde nünü müngühmühi atsünü api shoru; nünü suna müthsün kuthran api ku kheak yihkihjih.

⁴ Apinü nü kilimnü rhangdung kheang, tüsho nünü api kilim rhangdung kutsüpde alapü jih.

⁵ Nü akhümkhit ching api müretah tode lah; akinashu tüsho wüntre-müretah nünü api kheak yihkihjih.

⁶ Tümüde nünü api lünnü müngühmühi thsüjih; nünü nü bede api khitode asühde kamshih.

⁷ Tümüde kiulongthsüpuhnü Atungpuh kheak kinchoh, tüsho Khide Achangbuh mihmüthsüm hode api matrüt.

⁸ Nü khahnü nü riri alala tholobah; nü khah tsülimnü nü thraneanrü ramlobah.

⁹ Api akhiukchoki motrunü nangde arü dükheakshihbah. Atungpuhnü abukakhiukkhi ching arü muyubah, tüsho monü arü aniuabahbah.

¹⁰ Nünü arü münü alomi kheaknü tüsho arü tsührü mihtsürü tsührü bolungnü dükheakshihbah.

¹¹ Arünü nü azhihde amütsü lümkhi thsüthsü she, tüsho mihbukmuyuk lümkhi asahsah she arünü akuk müngü;

¹² nünü arü kheak nü hühzobonü akipbah, tüsho rholobah alihde atsoshihbah.

¹³ O Atungpuh , nü sühmüh ching shuhkihang; isanü khün thsübah tüsho nü wu shijihbah.