MUNGSHIKHÜN 19 - AMÜSÜH HÜM CL Bible (BSI)

¹ Yinmibonü Thrünpuh müretah khipkhitchoh; tüsho thüningbonü api khah rhimo huhchoh.

Thrüna Lakhi ching Thrünpuh Müretah

² Nimung akhiuk aban thachoh, tüsho tsüngre aban mükheahmudu akhiuka huhchoh.

³ Thiyubo thakhi yungsho thiyubo müla; arü düsheak muso;

⁴ tütüshe arü düsheak alomi alala ching, tüsho arü yubo alomiküp akheam ching yüchoh. Jurü ching apinü ani thsungkheak khimyam khülang thsüa lah,

⁵ ju yamkhün kamrü nihbuh khiungshak chingnü akhiukkhi, tüsho sühmüh larü mihtsürü nihbuh ru ching asühde alihkhi nangde lah.

⁶ Ha thüning akheam khülang chingnü akhiukchoh, tüsho akheam püpü lim yüchoh, tüsho ha atak chingnü tümü she jika müla.

Atungpuh Yakzan

⁷ Atungpuh yakzan ju banthsanglah, hanü sühmüh aso jihchoh; Atungpuh yukhümbo ju mulonglambe, amülarü kilim lümlung jihchoh.

⁸ Atungpuh yakzanbo alungki ah, mulong asühshihchoh; Atungpuh yukhümbo atsangkhitkhi, mükjibo yinshihchoh;

⁹ Atungpuh trekhi ju atsangkhit, lünnü lah; Atungpuh mahkhapkhibo ju alungki, tüsho thiyuro-lungki ah.

¹⁰ Jurübo suna kheaknü shoto, suna kheaknü alü atsangkhitbe; jurübo atsangkhitkhi mukhuke kheaknü aniungbe ah.

¹¹ Jurünü I nü yamlarü kilim mükheahmudu jihchoh; jurübo mihyuanikhi ching I thsambah ato lah.

¹² Tüshe shenü nihbuh mülimkhi ngükhitkhukla? Rama lakhi alakmihkhibo chingnü I müsühjang.

¹³ Lülüshishide alümkhi neakbo chingnü nü yamlarü küma zoang; arünü I kurungkheak yakzan düshuhshih. Judüki I ahühmüdam tüsho tode alakmihkhi mülade alabah.

¹⁴ I mün ching thiyubo tüsho I mulong ching lümkhibo nü miki aleangkhikhukbe kamshang, O Atungpuh , I tsoyukpung tüsho I rhokhitrü.