MUNGSHIKHÜN 149 - AMÜSÜH HÜM CL Bible (BSI)

Mungshikhi Khün

¹ Atungpuh shiang! Atungpuh ki khün aso khülang, tüsho amüsührü mukhungkhi ching api shijihkhibo thsang.

² Israelrü arü Thrünrü lung asühachihshang; Zion tsührübonü arü kiulongthsüpuh lung asühachihshang.

³ Arünü tsünde api mung shishang; arünü züpzüppü tüsho bingshang bede api mungshikhi khünbo thsüshang.

⁴ Tümüde Atungpuhnü api mihtsürü kheak asühlah; apinü azhihayihrü ju akuk ngükhinü akhamshihbah.

⁵ Amüsührübo müretah ching asühachihshang; arünü arü yapkiubo kheak achangnü khün thsüshang.

⁶ Arünü arü khah ching ayuk nukshangbo shuhbah achangnü zhide Atungpuh shishang,

⁷ trükshihbo kheak royimpü, tüsho mihtsürübo kheak thsümüchi lapü;

⁸ arü kiulongthsürübo wuhrünliubonü, tüsho arü limberübo yinchiliubonü arhükpü;

⁹ thrüta lakhi mahkhap arü kheak rhimopü– ha api amüsührü alala müretah lah. Atungpuh shiang!