MUNGSHIKHÜN 148 - AMÜSÜH HÜM CL Bible (BSI)

Thrünpuh Shipü Alomiküp Jikhi

¹ Atungpuh shiang! Yinmibo chingnü Atungpuh shiang; achangbo ching api shiang!

² Api shiang, api yunirü alalanü; api shiang, api putungrü alala!

³ Api shiang, ani tüsho khinu; api shiang, nüsa azhingzhing chiningbo alala!

⁴ Api shiang, nüsa yinmibo kheak yinmibo, tüsho nüsa thüning kumung kebo!

⁵ Arünü Atungpuh mung shishang, tümüde apinü thiyukhüm jih tüsho arübo thrün.

⁶ Apinü arübo lünnü lün thsüa lashih; apinü hode mutsopü lakhi thiyuzüng khülang thsü.

⁷ Alomi chingnü Atungpuh shiang, nüsa keto ato lorilokobo tüsho asükbo alala;

⁸ Mo tüsho arulung, phürüm tüsho amobo; api yu anikhi chinchobe apung;

⁹ müzüngbo tüsho awungbo alala; aso asokhi sangdungbo tüsho cedarbo alala;

¹⁰ mütüm shiwühbo tüsho moshibo; loriloko aninibo tüsho aphinkhi wuhnubo;

¹¹ alomi tüsho mihtsürü alala yo kiulongthsürübo; yakzanshuhrübo tüsho alomi mahkhaprü alala;

¹² athunu mihtsürü tüsho anünürü chido; ashinbuhrü tüsho azürübo.

¹³ Arünü Atungpuh mung shishang, api müretah ju alomi tüsho thüning kumung lah.

¹⁴ Tüsho apinü api mihtsürü juh shuhkihdo, api amüsührü alalanü ashijihkhi– api thüninde alakhi mihtsürü, Israel tsührübo. Atungpuh shiang!