MUNGSHIKHÜN 145 - AMÜSÜH HÜM CL Bible (BSI)

Mungshikhi Khün

¹ Inü nü shuhkihbah, I Thrünpuh, O kiulongthsüpuh; tüsho inü lünnü lün nü mung shibah.

² Nimung aban inü nü shibah tüsho inü lünnü lün nü mung shibah.

³ Atungpuh ju ato ah, tüsho tode ashijihpü lah; tüsho api tokhi ju müyimkhitkhukbe lah.

⁴ Lün khülangnü nü rhimobo püpürü ki shijihbah; tüsho nü rhimobo ato khipkhitbah.

⁵ Inü nü müretahde atsüdakkhi nü wüntre-müretah, tüsho nü amüyinsahbe rhimobo lümakheahbah.

⁶ Mihtsürübonü nü wuto atrebe rhimobo dünkheak asukbah, tüsho inü nü tokhi khipkhitbah.

⁷ Arünü nü tsüdakde mungthukhi dünkheak thabah, tüsho nü thiyuro-lungki dünkheak khün thsübah.

⁸ Atungpuh a mihmüthsüm tüsho amuzhonü mide lah, arünnü bukakhiukchoh tüsho amüthsüm ching tolah.

⁹ Atungpuhnü alala ki tsülah, tüsho api rhimobo alala kurungkheak api amüthsüm lah.

¹⁰ Nü rhimobo alalanü nü shibah, O Atungpuh , tüsho nü yo amüsührünü nü shibah.

¹¹ Arünü nü kiulongthsü müretah dünkheak asukbah; tüsho nü wu dünkheak thabah,

¹² mihtsürü tsührübo kilim api wuto rhimobo, tüsho müretahkhi api wüntre-müretah kiulongthsü mükheahshihpü lah.

¹³ Nü kiulongthsü ju akheam müla kiulongthsü, tüsho nü yakzan shuhkhi lün alala ching rünkhiungde lah.

¹⁴ Atungpuhnü akeamrü alala tholochoh, tüsho mükhüma larü alala bemusuchoh.

¹⁵ Alala mükbonü nü kheak mükkin thsüde kheahchoh, tüsho nünü arü kilim akheahmünchi dükdü ching tsühyungbe jihchoh.

¹⁶ Nünü nü khah khimshuhchoh tüsho rhangdung lakhi aban reangkeamshihchoh.

¹⁷ Atungpuh ju api limrobo alala ching thiyuro-lungki ah, api rhimobo alala ching amüthsüm lah.

¹⁸ Atungpuh a api thiyuro ching jirü alala thüninde lah.

¹⁹ Apinü anihbuh trerünü amulongkhi dünjishihbah; apinü arü zhikhi she asojihbah tüsho arü khümkhitbah.

²⁰ Atungpuhnü api muzhorü alala küma lashihchoh, tüshe apinü mihbukmuyuk alala thsümünimbah.

²¹ I münnü Atungpuh shikhi dünkheak asukbah, tüsho apinü athrünkhi alalanü api amüsüh mung lünnü lün shibah.