MUNGSHIKHÜN 144 - AMÜSÜH HÜM CL Bible (BSI)

Kiulongthsüpuhnü Makshe-jihkhi

¹ Atungpuh I lungto shiang, shepünü thirithsü thsungkheak I khahbo, tüsho keochihpü thsungkheak I yingkhingbo nokihjihcho–

² I muzhobuh tüsho I chipi, I yo aheangsadam tüsho I bekhitrü, I tsung tüsho I tsoyukpung, shepünü mihtsürü I khüp kamshihcho.

³ Atungpuh , mihtsürü ju tümü ah de nünü api mükheah-a lucho? Yungsho mihtsürü tsührü nünü lümanude lacho?

⁴ Mihtsürü ju sheak khülang ah; api nimungbo ju hoabahkhi me nangde lah.

⁵ O Atungpuh , thüning chakashungang tüsho akiang; müzüngbo qiuang, tüsho arünü mokhühbah.

⁶ Chinchobe phürapa yüshang tüsho arü hiumüzütshang; nü hühzobo kipang tüsho arü thsümünimang.

⁷ Achanglimnü nü khah chungkihang; ke atobo chingnü, khiungkerübo khah chingnü I khümkhitang tüsho bekhitang,

⁸ shepü münnü akeangkeang yubo asukcho, tüsho shepü khah tsülim ju arükchih khah tsülim la.

⁹ Inü nü ki khün aso khülang thsübah, O Thrünpuh; aliu thürü kihkhi bingshangnü nü ki inü müshikhibo thsübah,

¹⁰ shepünü kiulongthsürübo kilim akuk ngüshihcho, shepünü api yamlarü David bekhit.

¹¹ Khiungkerü khah chingnü I khümkhitang tüsho I bekhitang, shepü münnü akeangkeang yubo asukcho, tüsho shepü khah tsülim ju arükchih khah tsülim la–

¹² junangde isa tsührübo ju arü athunuchoki sangdung nangde azokihbah; akhamshihkhi dungjingbo nangde alabah;

¹³ junangde isa jakambo ju mungjithürü akhiukkhi ahiuhakhippü thsüde mikhiukde alabah; junangde isa yo namfimihnunubonü isa mükeakbo ching chithürübo tüsho chithürü thürübo bushihbah;

¹⁴ junangde isa moshipungbonü tsüde hah hanbah; ju ching chakashungde yüzahkhi tüsho awukhiukkhi müla; junangde isa kiudunglimrobo ching azhikhi müla.

¹⁵ Mihtsürü sherü hadürü lalim ching lanü asühpü; mihtsürü sherü Thrünpuh ju Atungpuh lanü asühpü!