MUNGSHIKHÜN 140 - AMÜSÜH HÜM CL Bible (BSI)

Kümdo Tamkhüntamnü

¹ O Atungpuh , amütsü mihtsürü kheaknü I bekhitang; athsümünim mihtsürü kheaknü I küma lashang,

² sherünü arü mulong ching amütsü lümkhi thsücho; arünü mutukzhakde thirithsüpü rukhüh mukhungchoh.

³ Arü mulo phuruto nangde zükhitchoh; arü münküpbo khüp ngümto müzüm lah.

⁴ O Atungpuh , mihbukmuyuk khahbo chingnü I kümdoang; I jing mükheshihpü lümkhi thsürü, athsümünim mihtsürü kheaknü I küma lashang.

⁵ Akükheangrünü I thsungkheak müthrim tüsho liubo rama zolah; arünü limro yean keang phua zolah; arünü I thsungkheak müthrim zolah.

⁶ Inü Atungpuh ki tha: Nü I Thrünpuh; inü amushukhi düsheak sojang, O Atungpuh .

⁷ O Atungpuh T HRÜNPU H , I akhümkhit sühmüh, nünü keochih nimung I ku muhiudojih.

⁸ O Atungpuh , mihbukmuyuknü akünkhi dümülüjih; api mihbukmuyuk lümkhi düpeangshangshih, jude yungsho arübo shuhkihbah.

⁹ I mükamdoa larü kubo ju, arü münküp amütsünü arü lüpdoshang;

¹⁰ Mokhih takkhi arü kheak keamshang; arübo masürülopü thsüde mo ching, asük ching jipyukshang.

¹¹ Thsüpkhilukhirü alomi ching dülashih; amütsürünü athsümünim mihtsürü lahyuka bahpü jimshang.

¹² Atungpuhnü thsünürü thsungkheak thsakhamchoh tüsho zhochihrü thsungkheak thiyuro zochoh de inü mükheahlah.

¹³ Tsükjide thiyuro-lungkirünü nü mung ching makshe jihbah; alungkirü nü miki labah.