MUNGSHIKHÜN 139 - AMÜSÜH HÜM CL Bible (BSI)

Thrünpuh Mükheahmudu tüsho Akümkhi

¹ O Atungpuh , nünü I yim tüsho I mükheahdo.

² Nünü I binkhi tüsho asürükhi mükheahlah; nünü I lümkhi limshu chingnü mükheahlah.

³ Nünü I tsahpung tüsho I yapkhi ngülah, tüsho I limrobo alala mütsanlah.

⁴ I mulo kheak thiyu mülayide nünü shahde mükheahlah, O Atungpuh .

⁵ Nünü I dunglim tüsho müngüh kapdolah; nünü nü khah I kheak yihkih.

⁶ Hadürü mükheahmudu ju I thsungkheaknü khide amüyinsahbe lah; ha changlah, inü ha manikhitkhuk.

⁷ Nü me chingnü I külim yükhukpü? Yungsho nü mikinü I küching tsokhukpü?

⁸ I thüning ching yüsho, nü ju ching lah; inü Ashe-lomi ching I yapkiu thsüsho, kheahang nü ju ching lah.

⁹ Inü aniakhiuklim phinde yüsho, yungsho aniyüzahlim limshu dangpung ching lasho,

¹⁰ ju ching she nü khahnü I bebah, tüsho nü khah tsülimnü I tholobah.

¹¹ Inü, “Tsükjide I kheak amiting keambah,” de thasho, azhing she I thsungkheak ayin labah;

¹² atsütsü, nü kheak amiting müjik, tüshe azhingnü she animung nangde yinchoh; amiting tüsho ayin chido nü ki rukhüh ah.

¹³ Tümüde nünü I alunglim mungjibo kamkhitshih; nünü I be nuyam ching I muhiudo.

¹⁴ Inü nü shijihbah, tümüde nünü I atrebe tüsho amüyinsahbe thsüde thrüna lah; amüyinsahbebo ju nü rhimobo lah, tüsho inü khide tsüde mükheahlah.

¹⁵ Küyimki I robo I be nuyam ching düshihde keakrude akamkhea, küyimki I ajik ching zode asürükhea, I ju ching lakhi nünü ngü–

¹⁶ I müzübeyide nünü I ngü; jurü mülayide I ki mülüjihkhi nimungbo alala nü hüm ching thrütyuka lakheah.

¹⁷ Nü lümkhi she küdükhüh I ki shoto la, O Thrünpuh! Jurü küdükhüh she la!

¹⁸ Inü jurü khekhülaa, loyi kheaknü ahihbe labah; küyimki I asürübanü, judü lang I nü lung lah.

¹⁹ O, nünü mihbukmuyuk laksahkhülaa, O Thrünpuh, junangde thiyih bukpü mihtsürübo I kheaknü achamachihbah.

²⁰ Tümüde arünü nü azhihde mihbukmuyuk asukchoh; nü riribonü akeangkeang ching nü mung ahorichoh.

²¹ O Atungpuh , nü thraneanrü inü müthranean de? Tüsho nü azhihde wusurü inü mümukhiuk de?

²² Inü arü shahde thraneanlah; inü arübo I riri ah de khejihchoh.

²³ I yimang, O Thrünpuh, tüsho I mulong mükheahang;

²⁴ tüsho I kheak mihbukmuyuk limro lanahnü kheahang, tüsho akheam mülakhi limro ching I beang.