MUNGSHIKHÜN 135 - AMÜSÜH HÜM CL Bible (BSI)

Mungshikhi Khün

¹ Atungpuh shiang! Atungpuh mung shiang; nüsa Atungpuh tankihrübo, api shiang!

² Nüsa sherü Atungpuh yam ching, Atungpuh isa Thrünpuh khikzhakpung ching zhipcho,

³ Atungpuh shiang, tümüde Atungpuh tsülah; api mung müshi khünbo thsang, tümüde api amuzho lah.

⁴ Tümüde Atungpuhnü anihbuh thsungkheak Jakob, büthsükhi api rahpung thsüpü Israel mokhitdo.

⁵ Tümüde Atungpuh ju ato ah de inü mükheahlah, tüsho isa Tungpuh ju thrünpuhbo alala kurungkheak lah.

⁶ Atungpuhnü tümüpürü mulongchonü apinü rhimochoh, yinmi tüsho alomi ching, ketobo tüsho asük dangpungbo alala ching.

⁷ Apinü alomi akheam chingnü kesheakbo akihshihchoh; apinü tsüng thsungkheak chinchobe thsüchoh; apinü api rahpungbo chingnü apung bekhitchoh.

⁸ Apinü Ijip adüjirü, mihtsürü tüsho shiwüh chido thsümünim.

⁹ Apinü nüsa bolung amütsanbo tüsho amüyinsahbebo, Pharao tüsho api yamlarübo alala kheak arüshih, O Ijip.

¹⁰ Apinü trükshihbo ahihdo kuk tüsho wuto kiulongthsürü laksah–

¹¹ Amorrü kiulongthsüpuh Sihon, Bashan kiulongthsüpuh Og, tüsho Kanan kiulongthsübo alala–

¹² tüsho api mihtsürü Israel kilim yamrüplurüp thsüde arü lomi jih.

¹³ O Atungpuh , nü mung lünnü rünkhiungde lah, O Atungpuh , nü mungshi lünbo alala ching lah.

¹⁴ Tümüde Atungpuhnü api mihtsürü mahkhapbah, tüsho apinü api yamlarübo kheak muzhobah.

¹⁵ Trükshihbo sangthsübo ju mihtsürü khah rhimobo shotoyinchi tüsho suna lah.

¹⁶ Arü münbo lah, tüshe arünü masuk; arü mükbo lah, tüshe arünü müngü;

¹⁷ Arü nükhünbo lah, tüshe arünü muso; yungsho arü münbo ching sheak müla.

¹⁸ Sherünü arü thsüchonü arü ruk ah; junangde arü kheak kinrü aban lah.

¹⁹ Atungpuh shiang, O Israel yamkhün! Atungpuh shiang, O Aron yamkhün!

²⁰ Atungpuh shiang, O Levi yamkhün! Nüsa Atungpuh trerübo, Atungpuh shiang!

²¹ Shepü Jirusalem ching lacho, Zion chingnü Atungpuh shiang! Atungpuh shiang!