MUNGSHIKHÜN 132 - AMÜSÜH HÜM CL Bible (BSI)

Arüngyam Shijihkhi

¹ Atungpuh , David tüsho api thsümütsübo alala lümkhitjang;

² apinü künangde Atungpuh ki alokhikhea, tüsho Jakob Wuto Thrünpuh ki thiyuchihchimkhea:

³ “Tsükjide I a I yam khiungshak ching müyüzah, yungsho I yapkiu kheak müyükih;

⁴ inü I mükbo tukde müyüshih yungsho I mükküpbo müdüküpshih,

⁵ inü Atungpuh thsungkheak dangpung, Jakob Wuto Thrünpuh thsungkheak lapung khülang müngüyi khiungde.”

⁶ Kheahang, isanü ju Ephratha ching sodo; isanü ju Jearim mükeakbo ching ngüdo.

⁷ Isanü api arüngkhimyam ching yüzahanü; isanü api jing dubopung ki kingaünanü.

⁸ O Atungpuh , asürang tüsho nü sühakhim dangpung lim arang, nü tüsho nü sühmüh sangdan.

⁹ Nü yo amükeamrübonü thiyuro-lungki yihshang, tüsho nü yo amüsührünü asühachihde shoshang.

¹⁰ Nü yamlarü David thsülimnü, nünü mujude-mokhitkhi miro dürholoshih.

¹¹ Atungpuhnü thiyuro ching David ki thiyuchihchim thsü; apinü ju chingnü murholo: “Inü nü tsührü bolungnü khülang nü kiulongthsü-binkiu kheak binshihbah.

¹² Nü tsührübonü I tangzüng tüsho inü arü ki thsangyupü lakhi I yakzan thsükhibo zosho, arü tsührübo she nü kiulongthsü-binkiu kheak lünnü abinbah.”

¹³ Tümüde Atungpuhnü Zion mokhitdo; apinü anihbuh lapü ha mulongdo:

¹⁴ “Ha lünnü I sühakhimpung ah; ha ching I labah tümüde inü ha mulongdo.

¹⁵ Inü anihbe yihnüpü lakhi suhdahde müngühjihbah; inü anihbe zhochihkhi yikhapnü reangkeamshihbah.

¹⁶ Inü anihbe yo amükeamrübo she akhümkhit phuyujihbah, tüsho anihbe amüsührünü asühachihde achangnü azhibah.

¹⁷ Ju ching inü David juh akhiukshihbah; inü mujude-mokhitkhi thsungkheak inü tsünpung khülang thsakhambah.

¹⁸ Inü api riribo achihnü alüpdojihbah tüshe api kiulongthsü akuk ngüde lalim tsübah.”