MUNGSHIKHÜN 119 - AMÜSÜH HÜM CL Bible (BSI)

Atungpuh Yakzan

¹ Shepü limro areak mükihde la, shepü Atungpuh yakzan ching tsahchonü müngühmühi!

² Shepü api yukhümbo zocho, shepü mulong athrünkhinü api yimchonü müngühmühi!

³ Arünü amülim she mürhimo; arünü api limrobo ching tsahchoh.

⁴ Nünü nü yakzan thiyuronü azoshihpü isa ki thiyukhüm jih.

⁵ O, I limrobo ju nü yakzan thsükhibo yanpü lakhülaa!

⁶ Judüki inü nü yukhümbo alala kheak kheahchoki I achih müngü.

⁷ Küyimki inü nü thiyuro-lungki mahkhapkhibo anikhitbanü, inü mulong alungkinü nü shibah.

⁸ Inü nü yakzan thsükhibo zobah, O I shahde dübahyuk!

Atungpuh Yakzan Anikhi

⁹ Küde thsah athunu mihtsürü khülangnü nihbuh limro müsühkhitkhukba? Nü yukhüm mihyuanikhi yande alabah.

¹⁰ I mulong athrünkhinü inü nü yimdo; O, I nü yukhümbo chingnü dakhinshih!

¹¹ Inü nü yu I mulong ching ramlah, junangde inü nü azhihde neak müyihbeak.

¹² Nü a müngühmühi ah, O Atungpuh ! Nü yakzan thsükhibo I ki thsangyuang.

¹³ Nü mün ching yo mahkhapkhibo alala inü I münküpnü khipkhitdo.

¹⁴ Inü nü yukhüm limrobo ching khürünü lakhit ato ching asühachihkhi nangde asühachihdo.

¹⁵ Inü nü yukhümbo tamkhüntamnüde alümbah, tüsho nü limrobo lümakheahbah.

¹⁶ Inü nü yakzan thsükhibo ching asühbah; inü nü yu mümih.

Atungpuh Yakzan ching Asühkhi

¹⁷ Nü yamlarü ki tsüde rhimoang, junangde I rhangdung labah tüsho nü yu anibah.

¹⁸ I mükbo khimshuhjang, junangde nü yakzan ching amüyinsahbebo inü angübah.

¹⁹ I a alomi ching hanrü khülang ah; nü yukhümbo I kheaknü düram.

²⁰ Kim alala ching nü yakzan mürheangkhinü I me thsünülah.

²¹ Muthrumüneana larü tüsho nü yukhümbo chingnü atsokhirü, kükheangküyangrü nünü thürühchoh.

²² I kheaknü mükhemükim tüsho abahyukpü yihkhita bahjang, tümüde inü nü yukhümbo zodo.

²³ Yakzanshuhrübonü she binchoh tüsho I azhihde asukchoh, tüshe nü yamlarübonü nü yakzan thsükhibo kheak lümakheahchoh.

²⁴ Nü yukhümbo I asühpü tüsho I lümthiyanrü lah.

Atungpuh Yakzan Anipü Lümkihkhi

²⁵ I asungthulung ching keama yaplah; nü yu yande I thsüphulojang.

²⁶ Inü I limrobo khipkhit, tüsho nünü I ki alojih; I ki nü yakzan thsükhibo thsangyuang.

²⁷ Nü yakzanbo anikhitpü I rungang, tüsho nü amüyinsahbe rhimobo kheak inü alümbah.

²⁸ Mulong rozhakkhinü I me khia lah; nü yu yande I düküngshang.

²⁹ Akeangyu limro chingnü I bekhitang, tüsho nü yakzan hode I ki muzhoang.

³⁰ Inü thiyuro limro mokhitdo; inü nü yakzanbo kheak I mulong zolah.

³¹ Inü nü yakzan thsükhibo kheak düngde tholobah, O Atungpuh ; I achih düngüshih.

³² Inü mulongde nü yukhümbo anibah, tümütüsho nünü anikhitkhi alü I kilim jihbah.

Anikhitkhi thsungkheak Tamkhüntamnü

³³ O Atungpuh , nü yakzanbo amütsan I ki thsangyuang, tüsho inü ju akheam khiungde azobah.

³⁴ I kilim anikhitpü jihang, tüsho inü nü yakzan zobah; atsütsü, inü ju I mulong athrünkhinü aleangkhibah.

³⁵ Nü yukhümbo limro ching I tsahshang, tümüde inü ju ching asühlah.

³⁶ Nü yakzan thsükhibo lim I mulong rholoshang tüsho mükhütmüra alü thsükhi lim yung.

³⁷ Müthülünkhi kukrukbo kheahkhi chingnü I mükbo rholoshang, tüsho nü limro ching I thsüphulojang.

³⁸ Nünü alokhikhi nü yamlarü ki dünjishang, junangde nü trebah.

³⁹ Inü trede alakhi mükhemükim lude tsoang, tümüde nü yakzanbo tsülah.

⁴⁰ Kheahang, inü nü yukhümbo mürheangde lah; nü thiyuro-lungki ching I thsüphulojang.

Atungpuh Yakzan Kinkhi

⁴¹ O Atungpuh , nü muzhodakkhi, nünü alokhikhi yande nü akhümkhit I kilim arüshang;

⁴² junangde I luhmünerü ki inü alopü lah, tümüde inü nü kheak kinchoh.

⁴³ I mün chingnü thiyuro yu düluakhin, tümüde nü yakzanbo ching inü I mulonglamlah.

⁴⁴ Inü kamruhroro nü yakzan anibah, lünnü lün thsungkheak.

⁴⁵ Inü zuzu ching tsahbah, tümüde inü nü yukhümbo yimkhitdo.

⁴⁶ Inü nü yukhümbo kiulongthsüpuh miki thabah, tüsho achih müngüde alabah.

⁴⁷ Tüsho inü muzhodakkhi nü yukhümbo ching asühbah.

⁴⁸ Inü muzhokhi nü yukhümbo ching I khah shuhkihchoh, tüsho nü yakzan thsükhibo kheak inü lümakheahchoh.

Atungpuh Yakzan ching Mulongram

⁴⁹ Nü yamlarü kilim nü yu lümkhitang, tümüde nünü I kilim mulonglam jih.

⁵⁰ Ha I thsünü ching I mulong shukheam lah, tümüde nü yunü I rhangdung jih.

⁵¹ Akükheangrünü kamruhroro I kheah-a münejihchoh, tüshe inü nü yakzan chingnü müchamachih.

⁵² Inü adüso nü mahkhapkhibo lümkhitbah, O Atungpuh , tüsho I küdah thsüde mulong shukheamchoh.

⁵³ Mihbukmuyuknü nü yakzan bahyukde inü angüchoki, I mulong zhipzhipde kamchoh.

⁵⁴ I amüsüh-hantsah yam ching nü yakzan thsükhibo ju I khünbo lakheah.

⁵⁵ Inü azhing ching nü mung lümkhitchoh, O Atungpuh , tüsho inü nü yakzan zochoh.

⁵⁶ Ha I yo kamdo, tümütüsho inü nü yukhümbo zodo.

Atungpuh Yakzan ching Mulong-jihkhi

⁵⁷ Nü a I shihcham ah, O Atungpuh ; inü nü yakzanbo anipü alokhichoh.

⁵⁸ Inü I mulong athrünkhinü nü muzho dünkheak mushu; nü yu yande I ki müthsümang.

⁵⁹ Inü I limro lümakheah tüsho I jingdükübo nü yakzan thsükhibo lim rholo.

⁶⁰ Nü yukhümbo anipü inü niokheam, tüsho mashu.

⁶¹ Mihbukmuyuk liubonü I rhük, tüshe inü nü yakzan mümih.

⁶² Nü thiyuro-lungki mahkhapkhibo dünkheaknü, inü nü kilim makshe jihpü tsüngphulung ching asürübah.

⁶³ I a nü trerü tüsho nü yukhümbo anirü alala müyamrü ah.

⁶⁴ O Atungpuh , alomi ju nü amüthsümnü milah; I ki nü yakzan thsükhibo thsangyuang.

Atungpuh Yakzan Adün Lakhi

⁶⁵ O Atungpuh , nünü nü yu yande nü yamlarü ki tsüde rhimodo.

⁶⁶ I ki mahkhap atsü tüsho mükheahmudu thsangyuang, tümüde inü nü yukhümbo ching kinchoh.

⁶⁷ I müthsünüde alachoki I tsokhia lakheah, tüshe kheakü inü nü yu zochoh.

⁶⁸ Nü a tsülah tüsho atsü thsüchoh; I ki nü yakzan thsükhibo thsangyuang.

⁶⁹ Kükheangküyang mihtsürübonü I dünkheak akeangyu thado, tüshe I mulong athrünkhinü inü nü yukhümbo anichoh.

⁷⁰ Harü mihtsürübo anikhitkhi müla, tüshe inü nü yakzan ching asühpü ngüchoh,

⁷¹ I thsümüchikhi ju I thsungkheaknü atsü lakheah, tümütüsho hanü I nü yukhümbo anikhitshih.

⁷² Nü mün ching yo yakzan ju I ki shotoyinchi nak tüsho suna chithürü kheaknü shoto ah.

Atungpuh Yakzan Thiyuro

⁷³ Nü khahbonü I thsü, tüsho nungnükhit; I ki anikhitpü jihang, junangde inü nü yakzanbo anikhitbah.

⁷⁴ Sherünü nü ki wüntre jihchonü arünü I ngüchoki asühbah, tümütüsho nünü alokhikhi ching inü kinchoh.

⁷⁵ O Atungpuh , nü mahkhapkhibo alungki ah de inü mükheahlah, junangde thiyuro lakhi ching nünü I thsünüshih.

⁷⁶ Nünü nü yamlarü ki alokhikhi nangde, mutukzhakde amuzhokhinü I mulong shukheamshang.

⁷⁷ I kheak müthsümang, tüsho I alabah tümütüsho inü nü yakzan ching asühchoh.

⁷⁸ Akükheangrü achih ngüshang, tümüde arünü I ki makhamde rhimodo; tüshe inü nü yukhümbo lümakheahbah.

⁷⁹ Nü yukhümbo mükheahrü sherünü nü trechonü I kilim rholoshang.

⁸⁰ Nü yakzan thsükhibo dünkheak I mulong mudomüra dülashih, junangde I achih müngüde alabah.

Bekhitkhi Tamkhüntamnü

⁸¹ Nü akhümkhit thsungkheak I me keaksahchoh, tüshe inü nü yu ching kinchoh.

⁸² Nü yu yimkhinü I mükbo keahkhide thachoh, “ Küyimki nünü I mulong shukheamba?”

⁸³ I a mokhüh yüngkihkhi shihküp-keluh nangde yihnüpü müla; tütüshe inü nü yukhümbo mümih.

⁸⁴ Nü yamlarü nimungbo küdükhüh a? Küyimki nünü I thsümüchirü kheak mahkhapba?

⁸⁵ Akükheangrünü nü yakzan müyande I thsungkheak alokhünbo kiua lah.

⁸⁶ Nü yukhümbo alala thiyuro ah; mülimde arünü I thsümüchichoh; I rungang!

⁸⁷ Arünü I alomi kheak kheammüchihshihdo, tüshe inü nü yukhümbo mübahyuk.

⁸⁸ Nü amuzho ayannü I thsüphulojang, junangde inü nü mün ching yo yakzan anibah.

Atungpuh Yakzan ching Akin Lakhi

⁸⁹ O Atungpuh , lünnü nü yu yinmi ching lah.

⁹⁰ Nü thiyuro lakhi lünbo alala ching rünkhiungde lachoh; nünü alomi adangpung ching zo, tüsho ha lah.

⁹¹ Arünü nü yuzüngbo yande khihni khiungde mutuklode lah, tümüde alala nü yamlarübo ah.

⁹² Nü yakzan ju I asühpü müthsükhülaa, I thsünü ching I dükheaka labah.

⁹³ Inü küyimkishe nü yukhümbo mümih, tümüde ju hode nünü I rhangdung jih.

⁹⁴ I nü yo ah, I khümkhitang; tümüde inü nü yukhümbo yimdo.

⁹⁵ Mihbukmuyuknü I thsümünimpü aleanglah, tüshe inü nü yakzanbo lümakheahbah.

⁹⁶ Lüpdükhi akhü thsülah de inü anikhitdo; tüshe nü yukhüm ju khiukdahlah.

Atungpuh Yakzan Muzhokhi

⁹⁷ Küdükhüh inü nü yakzan muzhola! Inü ha dünkheak nimung amuyung lümchoh.

⁹⁸ Kim alala ching nü yukhüm I lung lah tüsho I riribo kheaknü I lümlung labe kamshihchoh.

⁹⁹ I thsangyurübo alala kheaknü I alü anikhitkhi lah, tümüde nü yakzanbo ju I tamkhüntamnü-lüm lah.

¹⁰⁰ Ashinbuhrübo kheaknü a I lümlung tode lah, tümütüsho inü nü yukhümbo anichoh.

¹⁰¹ Inü amütsü rhimo alala bahkhido, tümütüsho inü nü yu aninelah.

¹⁰² Inü nü mahkhapkhibo chingnü müchamachih, tümüde nünü I thsangyukheah.

¹⁰³ Nü yubo küdükhüh she niungla, I mün ching mukhuke kheaknü aniungbe ah!

¹⁰⁴ Nü yukhümbo hode inü anikhitkhi ngüchoh; jumonü inü arükchih limro alala thraneanlah.

Atungpuh Yakzan chingnü Ayin

¹⁰⁵ Nü yu ju I jing ki tsün tüsho I limro ching ayin khülang ah.

¹⁰⁶ Inü nü thiyuro-lungki mahkhapbo zopü thiyuchihchimdo tüsho adüngakhi thsüdo.

¹⁰⁷ I khitode thsünüdo; O Atungpuh , nü yu yande I thsüphulojang.

¹⁰⁸ Inü makshe tamkhüntamnükhi leangkhijang, O Atungpuh , tüsho I ki nü yukhümbo thsangyuang.

¹⁰⁹ I rhangdung mutuklode I khah ching lah, tütüshe inü nü yakzan mümih.

¹¹⁰ Mihbukmuyuknü I thsungkheak müthrim zodo. Tütüshe inü nü yukhümbo chingnü makhin.

¹¹¹ Nü yukhümbo ju lünnü yamrüplurüp thsüde inü ludo, tümüde jurübo I mulong asühbe lah.

¹¹² Inü lünnü akheam khiungde nü yakzan thsükhi rhimopü I mulong rholodo.

Atungpuh Yakzan ching Tsoyukkhi

¹¹³ Inü lümtrüp thsükhi thraneanlah, tüshe inü nü yakzan muzholah.

¹¹⁴ Nü a I jikpü dangpung tüsho I tsung; inü nü yu ching mulonglamchoh.

¹¹⁵ I kheaknü chamkhiang, nüsa amütsü rhimorübo, tümüde inü I Thrünpuh yukhüm zobah!

¹¹⁶ I rhangdung lapü thsüde nü yu yande I tholojang; tüsho I mulonglam achih düngüshih.

¹¹⁷ I tholoang, tüsho I akhümkhitbah, tüsho inü nü yakzan thsükhibo mutuklode anibah.

¹¹⁸ Nünü nü yakzan thsükhibo chingnü atsorü alala bahyukchoh, tümüde arü mülapmüji ju arükchih ah.

¹¹⁹ Nünü lomi ching mihbukmuyuk alala müneang nangde tsoshihchoh; jumonü inü nü yukhümbo muzholah.

¹²⁰ Nü trekhinü I shih ajanchoh, tüsho inü nü mahkhapkhibo trelah.

Atungpuh Yakzan Anikhi

¹²¹ Inü thiyuro tüsho thiyuro-lungki rhimodo; I junorübo kilim I dübahjih.

¹²² Nü yamlarü tsüpü thsungkheak mütsanjungang; akükheangrünü I düjunoshih.

¹²³ Nü akhümkhit tüsho nü thiyuro-lungki yu yimkhinü I mük keahkhido.

¹²⁴ Nü amüthsüm yande nü yamlarü ki rhimoang, tüsho I ki nü yakzan thsükhibo thsangyuang.

¹²⁵ I nü yamlarü ah; I ki anikhitkhi jihang, junangde inü nü yakzan thsükhibo mükheahbah.

¹²⁶ Ha nünü arhimopü kim ah, O Atungpuh , tümüde arünü nü yakzan akeangkeang khejihchoh.

¹²⁷ Jumonü inü suna tüsho atsüdak suna kheaknü nü yukhümbo muzholah!

¹²⁸ Jumonü lüpdükhi thsungkheak nü yukhüm alala alungki de inü lümchoh; amülim limro alala inü thraneanlah.

Atungpuh Yakzan Anipü Mulongkhi

¹²⁹ Nü yakzan thsükhibo amüyinsahbe; jumonü I menü jurü zochoh.

¹³⁰ Nü yubo thanakkhinü ayin jihchoh; hanü makharü kilim lümlung jihchoh.

¹³¹ Inü I mün khimshuh tüsho sheak dükip, tümüde inü nü yukhümbo mürheangkheah.

¹³² I kheak kheahang tüsho I ki müthsümang, tümüde nü muzhorü alala ki nünü jude thsüchoh.

¹³³ Nü yu yande I jingdükü huhang, amülim tümünü I kurungkheak yakzan düshuhshih.

¹³⁴ Juno mihtsürü kheaknü I rhokhitang, junangde inü nü yukhümbo zobah.

¹³⁵ Nü yamlarü kheak nü miro yinshang, tüsho I ki nü yakzan thsükhibo thsangyuang.

¹³⁶ I mükbo chingnü ke yungbo bukkhichoh, tümütüsho mihtsürübonü nü yakzan muzo.

Atungpuh Yakzan Thiyuro

¹³⁷ Nü thiyuro-lungki ah, O Atungpuh , tüsho nü mahkhapkhibo alungki.

¹³⁸ Nünü thiyukhüm jihkhi nü yakzan thsükhibo thiyuro-lungki tüsho khide athülünkhi lah.

¹³⁹ I mulong zhipzhipkhinü monü nangde I takchoh, tümütüsho I riribonü nü yubo mihabahdo.

¹⁴⁰ Nü yu khide tsangkhitlah; jumonü nü yamlarünü ju muzhochoh.

¹⁴¹ I anikhüh ah tüsho mükhemükima lah, tütüshe inü nü yukhümbo mümih.

¹⁴² Nü thiyuro-lungki ju akheam müla thiyuro-lungki ah, tüsho nü yakzan ju thiyuro.

¹⁴³ Küpkhuk tüsho thsününü I tholodo, tütüshe nü yukhümbo ju I asühpü lah.

¹⁴⁴ Nü yakzan thsükhibo thiyuro-lungki ju akheam müla; I ki anikhitkhi jihang, tüsho I alabah.

Bekhitpü Tamkhüntamnü

¹⁴⁵ Inü I mulong athrünkhinü zhichoh; I ki aniang, O Atungpuh ! Inü nü yakzan thsükhibo zobah.

¹⁴⁶ Inü nü ki zhichoh; I khümkhitang tüsho inü nü yakzan thsükhibo zobah.

¹⁴⁷ Inü yapsu müyinkhiyide asürüchoh, tüsho arung thsungkheak zhichoh; inü nü yu ching mulonglamchoh.

¹⁴⁸ Nü yu kheak lümakheahpü lakhinü tsüngreroro I mük mutrulah.

¹⁴⁹ Nü muzhodakkhi yande I düsheak sojang; O Atungpuh , nü thiyuro yande I thsüphulojang.

¹⁵⁰ Mihbukmuyuk rük asahrü phünide lah, tüshe arübo nü yakzan kheaknü limshulah.

¹⁵¹ Nü thüninde lah, O Atungpuh , tüsho nü yukhümbo alala thiyuro ah.

¹⁵² Inü nü yakzan thsükhibo dünkheak adüsonü mükheahdo; nünü jurü lünnü alapü thsüjih.

Arung thsungkheak Mushukhi

¹⁵³ I thsünü lümakheahang tüsho I bekhitang, tümüde inü nü yakzan mümih.

¹⁵⁴ I dünkheak tsungdojang tüsho I rhokhitang; nü yu yande I thsüphulojang.

¹⁵⁵ Akhümkhit ju mihbukmuyuk kheaknü limshude lah, tümüde arünü nü yakzan thsükhibo müyim.

¹⁵⁶ Nü amüthsümbo ju ato ah, O Atungpuh ; nü mahkhapkhibo yande I thsüphulojang.

¹⁵⁷ I thsümüchirü tüsho I riribo hihlah, tütüshe inü nü yakzan thsükhibo chingnü murholo.

¹⁵⁸ Inü mülapmüjirü mukhiukde kheahchoh, tümütüsho arünü nü yu muzo.

¹⁵⁹ Inü küdükhüh nü yukhümbo muzholanü lümakheahang; O Atungpuh , nü muzhodakkhi yande I thsüphulojang.

¹⁶⁰ Nü yu abümnü thiyuro ah, tüsho nü thiyuro-lungki mahkhapkhibo lünnü rünkhiungde lah.

Atungpuh Yakzan lim Müsühkhitkhi

¹⁶¹ Yakzanshuhrübonü akeangnü I thsümüchichoh, tüshe I mulong a nü yu trekhi ching lah.

¹⁶² Khürünü lakhit ngükhi nangde inü nü yu ching asühchoh.

¹⁶³ Inü akeangyu thraneanlah, tüshe inü nü yakzan muzholah.

¹⁶⁴ Nü thiyuro-lungki mahkhapkhibo dünkheaknü inü nimung khülang ching thüne ki nü shijihchoh.

¹⁶⁵ Sherünü nü yakzan muzholanü mungtsü ato lah, tümünü she arü jing mümükheshih.

¹⁶⁶ Atungpuh , inü nü akhümkhit thsungkheak mulonglamchoh, tüsho inü nü yukhümbo rhimochoh.

¹⁶⁷ I menü nü yakzan thsükhibo zochoh, tüsho inü jurü hodakde muzholah.

¹⁶⁸ Inü nü yukhümbo tüsho nü yakzan thsükhibo zochoh, tümüde I limrobo alala nü miki lah.

Arung thsungkheak Tamkhüntamnü

¹⁶⁹ Inü azhikhi nü miki arüshang, O Atungpuh ; nü yu yande I kilim anikhitkhi jihang.

¹⁷⁰ Inü amushukhi nü miki arüshang, nü yu yande I bekhitang.

¹⁷¹ I münküpnü mungshi thabah, tümüde nünü nü yakzan thsükhibo I ki thsangyuchoh.

¹⁷² I mulonü nü yu dünkheak asukbah, tümüde nü yukhümbo alala thiyuro-lungki lah.

¹⁷³ Nü khah ju I rungrü kamshang, tümüde inü nü yukhümbo mokhitdo.

¹⁷⁴ Inü nü akhümkhit mürheangde lah, O Atungpuh , tüsho nü yakzan ju I asühpü lah.

¹⁷⁵ I me lashang, tüsho hanü nü shijihbah; tüsho nü mahkhapkhibonü I rungshang.

¹⁷⁶ I adükheakkhi namfimihnu nangde tsokhido; nü yamlarü yimang, tümüde inü nü yukhümbo mümih.