MUNGSHIKHÜN 116 - AMÜSÜH HÜM CL Bible (BSI)

Ashe chingnü Khümkhitrünü Thrünpuh Shichoh

¹ Inü Atungpuh muzholah, tümütüsho apinü I düsheak tüsho inü amushukhibo sojihdo.

² Tümütüsho apinü I kilim api nükhün muphojih, jumonü I külokhüh labanü inü api ki jibah.

³ Ashebe thsününü I mükamdo, tüsho Ashe-lomi mihtrebenü I tholo; inü küpkhuk tüsho mulong rozhak ngü.

⁴ Judüki inü Atungpuh mung ji: “O Atungpuh , inü nü ki mushuchoh, I khümkhitang!”

⁵ Atungpuh ju mihmüthsüm tüsho thiyuro-lungki lah; am, isa Thrünpuh ju amüthsümrü ah.

⁶ Atungpuhnü mulong thülihrü küma lashihchoh; I thsümütsü ching lachoki apinü I khümkhit.

⁷ Nü sühakhim lim rholoang, O I me, tümüde Atungpuhnü nü ki tsüde rhimodo.

⁸ Tümüde nünü ashekhi chingnü I me, chikebo chingnü I mükbo, tüsho akeamkhi chingnü I jingbo bekhit.

⁹ Inü arhang lakhi lomi ching Atungpuh miki tsahbah.

¹⁰ Inü akin lado, jumonü inü asuk, “I tode thsünüdo.”

¹¹ Inü niokheamde tha, “Mihtsürü alala akeangyu tharü ah.”

¹² Apinü I ki tsükhi alala dünkheak inü Atungpuh kilim tümü jihloba?

¹³ Inü akhümkhit pung lubah, tüsho Atungpuh mung jibah.

¹⁴ Kheakü api mihtsürü alala miki inü Atungpuh kilim thiyuchihchim jihbah.

¹⁵ Atungpuh miki shoto ju api amüsührü shekhi lah.

¹⁶ O Atungpuh , tsükjide I nü yamlarü ah; I a nü yamlarü tsührü nü yamlarü ah; nünü I rhükkhibo trünjih.

¹⁷ Inü nü kilim makshe jihde laksah-a kingaünkhi jihbah, tüsho inü Atungpuh mung jibah.

¹⁸ Kheakü api mihtsürü alala miki inü Atungpuh kilim thiyuchihchim jihbah,

¹⁹ Atungpuh yam khikzhakpung ching, nüsa bolung ching, O Jirusalem. Atungpuh shiang!