MUNGSHIKHÜN 112 - AMÜSÜH HÜM CL Bible (BSI)

Mihtsürü Atsü Asühkhi

¹ Atungpuh shiang! Mihtsürü shepünü Atungpuh trecho, shepünü api yukhümbo ching tode asühchonü müngühmühi.

² Api tsühsoniusobo alomi kheak wuto labah; alungkirü lün ju müngühmühibah.

³ Lalim-atsü tüsho lakhit api yam ching labah, tüsho api thiyuro-lungki lünnü rünkhiungde lah.

⁴ Alungkirü kilim amiting ching ayin akhiukbah; api amüthsüm lah, muzhomüyi tüsho thiyuro-lungkinü milah,

⁵ Mihtsürü atsünü amüthsüm lade rhimochoh tüsho nipjihchoh; apinü anihbuh shothsümolo thiyuronü akhualochoh.

⁶ Tsükjide küyimkishe api matrüt; thiyuro-lungkirü lünnü alümkhitbah.

⁷ Amütsü yusheakbo apinü mütre; api mulong düküngde, Atungpuh kheak kinchoh.

⁸ Api mulong murozhak yungsho mütre; api riribo kukkhi ngüpü lungdode lah.

⁹ Apinü khiungke lim ahiuhakhipdo, apinü zhochihrü kilim jihdo; api thiyuro-lungki lünnü rünkhiungbah; api mewün akin jihde ashuhkihbah.

¹⁰ Mihbukmuyuknü ju ngübah tüsho mulong rozhakbah; api hü mütrütbah tüsho niuabahbah; mihbukmuyuknü akünkhi dükheakbah.