MUNGSHIKHÜN 111 - AMÜSÜH HÜM CL Bible (BSI)

Atungpuh Shijihkhi

¹ Atungpuh shiang! Inü alungkirü mukhungkhi tüsho mukhungmüdan ching I mulong athrünkhinü Atungpuh shibah.

² Atungpuh rhimobo ju ato ah, jurü ching asührü alalanü lümakheahdo.

³ Api rhimo ju wüntrepü tüsho müretahpü lah, tüsho api thiyuro-lungki lünnü rünkhiungde lah.

⁴ Apinü api amüyinsahbe rhimobo lümkhitpü thsü; Atungpuh ju mihmüthsüm tüsho muzhomüyinü milah.

⁵ Apinü api trerü kilim tsühyungbe jih; apinü api tangzüng lünnü lümanude alabah.

⁶ Apinü api mihtsürübo kilim trükshihbo yamrüplurüp jihde api rhimobo wu khipkhit.

⁷ Api khah rhimobo ju alungki tüsho thiyuro; api yakliyakko alala athülünkhi lah.

⁸ Jurü lünnü lün düküngde zhiplah, thiyuro tüsho alungki ching rhimoa lah.

⁹ Apinü api mihtsürübo kilim arhokhitkhi yüshih; apinü api tangzüng lünnü thiyukhüm jih: Amüsüh tüsho atrebe ju api mung.

¹⁰ Atungpuh trekhi ju lümlung atankih ah; api yukhümbo rhimorü alala anikhitkhi atsü lah. Api shijihkhi lünnü rünkhiungde lah.