MUNGSHIKHÜN 105 - AMÜSÜH HÜM CL Bible (BSI)

Thrünpuh tüsho Amihtsürübo

¹ O, Atungpuh ki makshe jihang! Api mung jiang; api rhimobo mihtsürü bolung mükheahshang.

² Api ki khün thsang, api ki mungshikhünbo thsang; api amüyinsahbe rhimobo alala dünkheak thaang.

³ Api amüsüh mung ching müretahang; Atungpuh yimrü mulongbo asühachihshang.

⁴ Atungpuh tüsho api sühmüh yimang; kamruhroro api miro yimang.

⁵ Apinü athsükhi api amüyinsahbe rhimobo lümkhitang, api amüyinsahbebo tüsho api mün chingnü mahkhapkhibo,

⁶ O api yamlarü Abraham müjih, nüsa Jakob tsührübo, apinü amokhitkhibo!

⁷ Api ju Atungpuh isa Thrünpuh ah; api mahkhapkhibo alomi alala ching lah.

⁸ Apinü tangzüng, lün chithürübo thsungkheak thiyukhüm jihkhi ju apinü lümkhitdo,

⁹ apinü Abraham ki thsükhi tangzüng tüsho Isak ki thiyuchihchimkhi,

¹⁰ Jakob ki yakzan thsükhi thsungkheak, Israel ki akheam müla tangzüng thsungkheak adüngakhi thsü,

¹¹ tha, “Inü nü yamrüplurüp kilim mülükhi thsüde Kanan lomi jihbah,”

¹² küyimki arübo akhekhi nükde alakhea, atsütsü ju ching khide nükde, tüsho jaksorü lakheah.

¹³ Küyimki arü trükshih khülang chingnü püpü lim, kiulongthsü khülang chingnü püpü mihtsürü kilim yükhea,

¹⁴ apinü she ki she amülim rhimo mümülü; arü thsungkheaknü apinü kiulongthsürübo thürüh,

¹⁵ tha, “Inü mujude-müsühkhitkhi düqiu, tüsho I yo wukihrübo dütrünthsü.”

¹⁶ Judüalalashe apinü lomi ching khümzung arüshih; tüsho arü tsühyungbe alala thsümünimjih.

¹⁷ Apinü arü müngüh mihtsürü khülang, azhorü thsüde ayinkhi Josep yüshih.

¹⁸ Api jingbo wuhrünliubo ching zo, tüsho yinchilak api hung ching mükamyukjih.

¹⁹ Api yu müdünjiyi kim khiungde, Atungpuh yunü api rükakheah.

²⁰ Kiulongthsüpuhnü yüshihbah api dükheshih, mihtsürü yakzanshuhbuhnü api zuzu thsüde tsoshih.

²¹ Apinü anihbuh yamkhün kurungkheak api atungrü, tüsho api yamalo alala yakzanshuhrü kamshih,

²² api künkhi ching anihbuh torübo rhükpü tüsho api thsangdanrü ki lümlung thsangyushihpü jih.

²³ Israel she Ijip ching arü, tüsho Jakob Ham lomi ching tsoyuka la.

²⁴ Tüsho apinü api mihtsürü tode jashih, tüsho arü riribo kheaknü sühmüh lakhi kamshih.

²⁵ Apinü arü mulong api mihtsürü thraneande, api yamlarübo ki mülapmüjide kamshih.

²⁶ Apinü ayamlarü Mosa tüsho apinü mokhitkhi Aron thiyi.

²⁷ Arünü api khinthiyinbebo arü bolung, tüsho amüyinsahbebo Ham lomi ching rhimo.

²⁸ Apinü amiting yüshih, tüsho ju mitingde kam; tüsho arünü api yu mazhih.

²⁹ Apinü arü kebo thiyih kamshih, tüsho arü ngühbo sheshih.

³⁰ Arü lomi kheangbonü, arü kiulongthsübo khiungshakbo ching she mithülamde kam.

³¹ Apinü tha, tüsho somünakbo le kurheakbo arü lo alala ching arü.

³² Apinü tsüng nangde arulung arü kilim jih, tüsho arü lomi ching motrushih.

³³ Apinü arü kurungasoliubo le khubasodungbo tüsho arü lomi ching sangdungbo alala keamshih.

³⁴ Apinü tha, tüsho tangkhobo, mükhebinkhi tangkho nunubo arü,

³⁵ tüsho arü lo ching wokephüyak le arü lomi sangaso alala tsühabah.

³⁶ Apinü Ijip yamkhün alala ching tsührü adüjirü alala laksah.

³⁷ Apinü arübo shotoyinchi tüsho suna bede bebah akhiuk, tüsho api trükbo lung sheshe sühmüh mülarü mülakheah.

³⁸ Küyimki arü chamachihkheanü Ijip asühde alakheah, tümüde Israelrü trekhi arü kheak akih.

³⁹ Apinü aliudokhi amo shoshih, tüsho azhing ching ayin jihpü mo lakheah.

⁴⁰ Mihtsürübonü kheang, tüsho apinü wuhkhi lude arü, tüsho yinmi yikhapbonü arü reangkeamshih.

⁴¹ Apinü lungto khimshuh, tüsho ke bukkhit; ayung nangde akung dangpungbo ching buk.

⁴² Tümüde apinü api amüsüh alokhikhi tüsho ayamlarü Abraham lümkhit.

⁴³ Apinü anihbuhnü mokhitkhi api mihtsürübo asühde bekhit.

⁴⁴ Apinü arü kilim khiungkerü lobo jih, tüsho arünü trükshihbo khuksahkhi yamrüplurüp lu,

⁴⁵ junangde arünü api yakzan thsükhibo tüsho api yakzan anipü lakheah. Atungpuh shiang!