MUNGSHIKHÜN 103 - AMÜSÜH HÜM CL Bible (BSI)

Thrünpuh Amuzho

¹ Atungpuh shiang, O I me; tüsho I kheak lakhi alala, api amüsüh mung shiang!

² Atungpuh shiang, O I me, tüsho api alü thsükhibo alala dümih:

³ shepünü nü neakbo alala bahjihcho, shepünü nü tukthsübo alala thsüngucho,

⁴ shepünü athsümünim chingnü nü rhangdung rhokhitcho, shepünü mihmuzho tüsho amüthsümbonü nü kheak thranjihcho,

⁵ shepünü atsü kukrukbonü nü rhangdung reangkeamshihcho, junangde nü athunu ju müleang nangde reangzahshih.

⁶ Atungpuhnü junoa larü alala thsungkheak thiyuro-lungki tüsho thiyuro rhimochoh.

⁷ Apinü api limrobo Mosa ki, api rhimobo Israel mihtsürübo ki mükheahshih.

⁸ Atungpuh , ju mihmüthsüm, amuzho, arünnü bukakhiukchoh, tüsho amüthsüm ching suhdahlah.

⁹ Apinü lünnü isa kheak müshochih, yungsho lünnü api bukakhiukkhi muzo.

¹⁰ Apinü isa neakbo yande mürhimo, yungsho isa amülimbo yande müthsümüchi.

¹¹ Tümüde yinmibo ju alomi kumung changlah, junangde api trerü kilim api amüthsüm tode lah;

¹² Aniakhiuklim ju aniyüzahlim kheaknü limshukhi nangde, apinü isa neakbo isa kheaknü limshude luakhindo.

¹³ Buhrünü tsührü muzhokhi nangde, Atungpuhnü api trerü muzhochoh.

¹⁴ Tümüde apinü isa thrünkhi mükheahlah; isa asungthulung ah de apinü lümkhitchoh.

¹⁵ Mihtsürü thsungkheak a, api nimungbo rim nangde lah; mütüm sangbün nangde api tsüde tochoh.

¹⁶ Tümüde ju kheak apung yünchoh tüsho tsoabah, tüsho ju dangpung mülümkhitlo.

¹⁷ Tüshe Atungpuh amüthsüm ju api trerü kilim akheam mülanü akheam müla khiungde, tüsho api thiyuro-lungki ju tsührü tsührübo khiungde lah,

¹⁸ api tangzüng zorü kilim tüsho sherünü api yukhümbo rhimopü lümkhitcho.

¹⁹ Atungpuhnü api kiulongthsü-binkiu yinmi ching thsüa zolah, tüsho api kiulongthsünü alala kurungkheak yakzan shuhchoh.

²⁰ Nüsa api yunirübo, sherü sühmüh hodakla, sherünü api yukhüm anicho, sherünü apinü athakhi anicho, Atungpuh shiang.

²¹ Atungpuh shiang, nüsa api putungrübo, api lümkhi thsürü api tankihrübo!

²² Api rhimo alala, apinü yakzan shuhkhi alala dangpung ching Atungpuh shiang. Atungpuh shiang, O I me!