MÜCHITMUDU 7 - AMÜSÜH HÜM CL Bible (BSI)

¹ I tsah-a, I yubo zoang tüsho I yukhümbo nü kheak lashang.

² I yukhümbo zoang tüsho laang, tüsho I yakzan ju nü mükji sangaso nangde zoang.

³ Jurübo nü yingkhingbo kheak rhükkihang; nü mulong kheak jurübo thrütang.

⁴ Lümlung ki, nü chi tüsho anikhitkhi ki nü keoniorü thsüde jiang,

⁵ junangde jurünü yüliyüra liberü, anihbe yubonü münityukpü lakhi kheaknü abemuwuhbah.

Yüliyüra Liberü

⁶ Tümüde inü I yam ayinripit ayak-dokhi chingnü abina kheah,

⁷ tüsho rük-thülihrü athunurü bolung anikhitpü mülakhi athunu mihtsürü khülang ngükhit,

⁸ kiudunglimro ching anihbe mühit phünide hode la; tüsho apinü alibe yam lim tsahde yü,

⁹ shuhyini ching, arelim, amiting tüsho azhing ching.

¹⁰ Tüsho ju ching aliberü khülangnü müzammüram khimmih yihbah münityukpü asahde api shoru.

¹¹ Alibe ju mizamrü tüsho achihayak mülade, wungdophulung lang tsahde alakheah.

¹² Kim khürü ching kiudunglimro, kim khürü ching wungdophulung, amühit aban jika binde la.

¹³ Jumonü alibenü api tholo tüsho müthsüp; miro dünkhitbah alibenü api ki tha:

¹⁴ “ I lung mungtsü kingaün lah; khihni inü thiyuchihchim jihdo.

¹⁵ Jumonü I nü shorupü, düshihde nü yimpü akhiukkheah, tüsho inü nü yimkhitdo.

¹⁶ Inü ashihphü lakhi Ijip khimthünaknü I yapkiu khimlah.

¹⁷ Inü jinjinlak, aloe tüsho sinamonnü I yapkiu arhümthüneade zolah.

¹⁸ Arang, ikenü yapsu khiungde muzhoachihanü; ikenü muzhode asühachihanü.

¹⁹ Tümüde I yamkhünbuh thüyam ching müla; api hantsah ashang ching yüdo;

²⁰ api lung sho qiuqiu lulah, tüsho amu-khip mahne khiungdüa malung.”

²¹ Alibenü amünit yubonü api bephülap; anihbe yu thünakkhinü api rükyuk.

²² Nahdü lang apinü moshipung alaksahpü yükhi nangde yungsho shihmüchi azheang ching düküyukkhi nangde alibe dunglim yü,

²³ hühzonü api müsan müchinkhityi khiungde; wuhnu khülang qimürip lim athride ayükhi nangde–hanü api rhangdung lubah de apinü mümükheah.

²⁴ Jumonü kheakü I ki aniang, I tsührübo; inü athakhi aniang:

²⁵ nü mulongnü anihbe limro lim dübephülapshih; anihbe tsahpungbo ching düyü;

²⁶ tümüde alibenü ahihdo yuria keamshihdo, tüsho anihbenü alaksahkhi alala sühmüh larü mihtsürübo lakheah.

²⁷ Alibe yam ju kiuyuk limro lah, ashe khiungshakbo lim yükichoh.