MÜCHITMUDU 3 - AMÜSÜH HÜM CL Bible (BSI)

Athunurü Thsangdankhi

¹ I tsah-a I yakzan dümih, tüshe nü mulongnü I yukhümbo zoshang;

² tümüde jurünü nü kilim nimung ashang, rhangdung ashang tüsho mungtsü yukajakjihchoh.

³ Mihmüthsüm tüsho thiyuronü nü dübahyukshih; jurü nü hung mükamde rhükkihang, nü mulong kheak thrütkihang,

⁴ junangde nünü Thrünpuh tüsho mihtsürü miki amuzho tüsho mung atsü ngübah.

⁵ Nü mulong athrünkhinü Atungpuh kheak kinang tüsho nü anikhitkhi kheak dangükih;

⁶ nü limrobo alala ching api mütsankhitang tüsho apinü nü limro alungki huhbah.

⁷ Nü küdah thsüde nü alü lümlung larü ah de dülüm; Atungpuh treang tüsho amütsü chingnü rholoang.

⁸ Ha nü shih ching shihphü-atsü labah, tüsho nü robo ching sühmüh labah.

⁹ Nü lakhitbo tüsho nü rünkihkhi alala akhuh asokhibonü Atungpuh wüntre jihang;

¹⁰ junangde nü jakambo muzhomopungkhinü amikhiukbah, tüsho yukhu asonü nü keluhbo zhikhiukbah.

¹¹ I tsah-a, Atungpuhnü adanyukkhi mükhemükim düthsü tüsho apinü athürühkhi bukdakhiuk,

¹² tümütüsho buhrü khülangnü tsührü kheak asühkhi nangde Atungpuhnü shepü kheak muzhochonü apinü thsülangchoh.

¹³ Mihtsürü shepü lümlung ngücho, tüsho mihtsürü shepü anikhitkhi alü thsüchonü asühpü;

¹⁴ tümüde ju chingnü alü thsükhi ju shotoyinchi chingnü alü thsükhi kheaknü atsübe, tüsho ha alü thsükhi ju suna kheaknü atsübe.

¹⁵ Anihbe ju mürezhingzhing kheaknü alü shoto tüsho nünü amürühkhi tümünü she anihbe makekhuk.

¹⁶ Rhangdung ashang anihbe khah tsülim ching lah; anihbe khah huzulim ching lakhit tüsho wüntre lah.

¹⁷ Anihbe limrobo ju abünazün tüsho anihbe tsahpungbo mungtsü lah.

¹⁸ Anihbe kheak tholorü kilim hoju rhangdung sangdung ah; düngde anihbe tholorü ki asühpü de jichoh.

¹⁹ Lümlung hode Atungpuhnü alomi khimtan thsü; api anikhitkhi hode apinü thüningbo adangpung ching zo;

²⁰ api mükheahmudu hode asükbonü jukphukde akhiuk, tüsho amobonü ayinke atsamkhishih.

²¹ I tsah-a, lümlung atsü tüsho adüngakhi zoang; jurü nü mikinü dakhinshih,

²² arübo nü thsungkheak rhangdung, nü hung züt thsüpü zülu labah.

²³ Judüki nü limro ching nü kuram tsüde atsahbah tüsho nü jing mümükhe.

²⁴ Küyimki nü ayapbanü, nü trede müla; am, nü ayapbah tüsho nü yapkhi ju aniung labah.

²⁵ Zukleangnü atrebe lakhi yungsho mihbukmuyuk kheaknü küpkhuk arüchoki dütre;

²⁶ tümüde Atungpuh ju nü mulongram labah, tüsho nü jing müthrim ching mükeamyukshih.

²⁷ Arhimopü nü kheak wu lachoki athülünrü kheaknü atsü dütuklo.

²⁸ Nünü kheakü labahle nü yamhingrü ki yüang tüsho shido lang ajihbale alode arang de dütha.

²⁹ Nünü nü yamhingrü yuripü thsüde tümü lümkhi düthsü; apinü nü kheak kinde lah.

³⁰ Apinü nü ki amütsü tümü müthsüsho, amütsan mülade mihtsürü she ki she dürukachih.

³¹ Athsümünimrü mükdüthsü, tüsho api limrobo küpü she dümokhit;

³² tümüde münitphülap mihtsürü ju Atungpuh kilim athraneanbe lah, tüshe rama lakhi api lümthiyan ju alungkirü kheak lah.

³³ Atungpuh muthrumünean ju mihbukmuyuk yam kheak lah, tüshe apinü thiyuro lapung müngühjihchoh.

³⁴ Tsükjide apinü lülüshishide keangrümünerü ki keangrümünechoh, tüshe azhihayih kilim amüthsüm jihchoh.

³⁵ Lümlung larü a müretah yamrüplurüp lubah, tüshe makharübo a mungchih ngükhi labah.