MÜCHITMUDU 29 - AMÜSÜH HÜM CL Bible (BSI)

¹ Shepü alochode thsülangjihjih she mulong müküpchonü, müthsüngukhukpü thsüde zukleangnü athsümünimbah.

² Küyimki thiyuro-lungkirünü yakzan shuhbanü, mihtsürübo asühachihchoh; küyimki mihbukmuyuknü yakzan shuhbanü, mihtsürübo phüthsaksümchoh.

³ Shepünü lümlung muzhochonü nihbuh abuh asühshihchoh, tüsho müzammüramrü atruachihrünü api lakhit phinphurukchoh.

⁴ Kiulongthsürünü thiyuro hode alomi düküngshihchoh, tüshe shepünü buknimbo leangkhichonü ju thokheamchoh.

⁵ Mihtsürü shepünü api yamhingrü mülapyukchonü anihbuh jing thsungkheak azheang zochoh.

⁶ Alakmihkhi hode amütsü mihtsürü phuh-a lah, tüshe thiyurolungkirü khün thsüchoh tüsho asühachihchoh.

⁷ Thiyuro-lungkirünü zhochihrü dünkheak lümakheahchoh, tüshe mihbukmuyuknü hadürü manikhit.

⁸ Luhmünerünü kiuto alanajide kamshihchoh, tüshe lümlung lakhi mihtsürünü bukakhiukkhi tsoloshihchoh.

⁹ Lümlung lakhi mihtsürünü makha mihtsürü kheak atsangachihsho makharünü bukakhiukkhiuk she yungsho münene she, ju ching keamramde müla.

¹⁰ Thiyih yungdanrünü amülim mülarü thraneanchoh, tüshe thiyurolungkirünü api tsüde alashihpü yimchoh.

¹¹ Makharünü aleangkheak akhiukde abukakhiukchoh, tüshe lümlung lakhi mihtsürünü jurü tuklochoh.

¹² Yakzanshuhrünü akeangyubo anisho, api torü alala mihbukmuyuk kamchoh.

¹³ Zhochih mihtsürü tüsho api junorü ha rukhüh lah: Atungpuhnü ane chido mükbo kilim ayin jihchoh.

¹⁴ Kiulongthsürü khülangnü thiyuronü zhochihrü mahkhapsho api kiulongthsü kamruhroro labah.

¹⁵ Tso tüsho athürühkhinü lümlung jihchoh, tüshe azürü khülang aküdah thsüde zojihsho anihbuh abe kilim achih handarüchoh.

¹⁶ Küyimki mihbukmuyukbo wu labanü alakmihkhibo alü kamchoh; tüshe thiyuro-lungkirünü arübo keamkhi ngübah.

¹⁷ Nü tsührü thsülangang, tüsho apinü nü sühakhim jihbah; apinü nü me asühpü jihbah.

¹⁸ Küching müchitkhi mülabanü mihtsürü dungmihchoh, tüshe shepünü yakzan zochonü müngühmühi.

¹⁹ Yamlarü khülang thiyubo müthsünnü lang müdankhukchoh, tümüde apinü anikhitkhit she, apinü manijih.

²⁰ Mihtsürü khülang api yu niokheamde nünü ngüchonah? Api kheaknü a makharü thsungkheak mulonglam alü lah.

²¹ Nünü nü yamlarü azüchokinü apinü alunekhi lüpdükhi jihsho, nimung khürü ching a apinü nü yo lüpdükhi luabahbah.

²² Bukakhiukrünü rukachih akhiukshihchoh, tüsho bukmükerünü hihde athsümünim akhiukshihchoh.

²³ Mihtsürü lülüshishinü nihbuh abobe kamshihchoh, tüshe me ching azhihayihkhinü wüntre ngüchoh.

²⁴ Shepünü ahührü lung atruachihchonü apinü nihbuh rhangdung thraneanchoh; apinü thiyuro thapü thiyuchihchimchoh, tüshe tümü akhiuka muhuh.

²⁵ Mihtsürü trekhinü müthrim handarüchoh, tüshe shepünü A TUN GPU H kheak kinchonü akhümkhitbah.

²⁶ Ahihkhühnü yakzanshuhrü amuzho yimchoh, tüshe mihtsürü thsungkheak thiyuro ju Atungpuh kilimnü ngüchoh.

²⁷ Thiyuro-lungkirünü thiyuro mülarü thraneanchoh; mihbukmuyuknü alungkirü thraneanchoh.