MÜCHITMUDU 28 - AMÜSÜH HÜM CL Bible (BSI)

¹ Mihbukmuyuk a shenü mümüshamde tsochoh, tüshe thiyuro-lungkirü a kekhüzü nangde mulong tolah.

² Tümütüsho lomi thsümünimkhinü, yakzanshuhrü hihde lah; tüshe anikhitkhi tüsho mükheahmudu mihtsürünü thiyukhüm ahorichoh.

³ Yakzanshuhrü khülang shepünü zhochihrü junochonü hi maningshihde adütsütkhi tsüng nangde lah.

⁴ Shepünü yakzan bahyukchonü mihbukmuyuk shijihchoh, tüshe shepünü yakzan zochonü arü azhihchoh.

⁵ Amütsü mihtsürünü thiyuro mümükheah, tüshe sherünü A TUN GPU H yimchonü alala anikhitlah.

⁶ Alarü thsübah nihbuh limrobo ching mülapmüjikhi kheaknü thiyuro ching tsahkhi zhochihrü atsübe.

⁷ Shepünü yakzan zochonü rükri lakhi tsührü ah, tüshe bukchihrü lung müyamrü thsürünü abuh mungchih kipchoh.

⁸ Shepünü sholü lude nihbuh lakhit rünkihchonü zhochihrü muzhorü khilim hanmukhungchoh.

⁹ Shepünü yakzan anipü chingnü anükhün anguhde tsochonü, api tamkhüntamnü athraneanbe labah.

¹⁰ Shepünü alungkirü amütsü limro ching tsoshihchonü, api a nihbuh shingkung ching yüzahbah; tüshe mungchih mülarü a yamrüplurüp atsü leangkhibah.

¹¹ Alarü mihtsürünü kamruhroro arü alarü ah de lümchoh, tüshe zhochih mihtsürü shepü anikhitkhi lanü atsübe mükheahlah.

¹² Küyimki thiyuro-lungkirü asühachihbanü, ju ching müretahkhi ato lah; tüshe küyimki mihbukmuyuk asürübanü, mihtsürübonü jikabahchoh.

¹³ Shepünü nihbuh neakbo ramchonü akuk müngüchoh, tüshe shepünü jurü alokhiabahcho tüsho bahyukchonü mihmüthsüm labah.

¹⁴ Shepünü kamruhroro Atungpuh trechonü müngühmühi mihtsürü, tüshe shepü nihbuh mulong müküpchonü thsümütsü ching keamyukbah.

¹⁵ Mihbukmuyuknü zhochihrü kurungkheak yakzan shuhkhi ju arungkhi kekhüzü yungsho kuto amürük nangde lah.

¹⁶ Yakzanshuhrü shepü anikhitkhi mülanü junorü ato ah, tüshe shepünü yihnelune thraneanchonü nihbuh nimungbo beshangchoh.

¹⁷ Mihtsürü shepü thiyih bukkhi amülim lanü ashekhün ching shande ayübah; shenü she api dürungshih.

¹⁸ Shepü mungchih mülade tsahchonü akhümkhitbah, tüshe shepü nihbuh limrobo ching mülapmüji lanü zukleangnü alungbah.

¹⁹ Shepünü nihbuh lo wochakchonü yikhapbo suhdahde alabah, tüshe shepü milimyulim müshamchonü mükheakmürakde alabah.

²⁰ Thiyuro lakhi mihtsürü suhdahde müngühmühibah, tüshe shepü alakhitpü niokheamchonü müthsümüchidüa mutso.

²¹ Jakkheahkhi ju atsü yung, tümütüsho yikhap khülang dün mihtsürünü amülim rhimobah.

²² Mükhütmüra mihtsürünü lakhitbo dunglim müshamchoh, tüsho nihbuh kheak mükheakmürak arübah de apinü lümamükheah.

²³ Mulonü tsanphülapde athakhi kheaknü a shepünü mihtsürü khülang ki thürühchonü ashulim muzhode alümkhi ngübah.

²⁴ Shepünü nihbuh abuh yungsho abe jangkhijangracho, tüsho “Ha amülim yung” de thacho, api ju athsümünimrü atruachihrü ah.

²⁵ Shepünü lülüshishi mulong hanlanü rukachih thurumusuchoh, tüshe shepü Atungpuh kheak kinchonü lalim tsübah.

²⁶ Shepünü nihbuh mulong kheak kinchonü makharü, tüshe shepü lümlung lade tsahchonü akhümkhitbah.

²⁷ Shepünü zhochihrü kilim jihchonü zholümde müla, tüshe shepünü mükbo tukchonü muthrumüneanbo ahihdo labah.

²⁸ Küyimki mihbukmuyuk wu labanü, mihtsürübo jikchoh; tüshe küyimki arü wu dükheakbanü, thiyuro-lungkirünü yakzan shuhchoh.